लामिछानेयात नं बयानया लागिं सःतल

येँ (नेपालभाषा टाइम्स)- सहकारी ठगी बारे छानबिन यानाच्वंगु संसदीय छानबिन समितिं पुलांम्ह गृहमन्त्री लिसें रास्वपाया सभापति रवि लामिछानेयात बयानया निंतिं सःतूगु दु । लामिछानेयात थौं शुक्रवाः बयान बीत सःतूगु खः । लामिछानेयात गोर्खा मिडिया नेटवर्क प्रा.लि.या प्रबन्ध निर्देशकया ल्याखं बयान कायेत्यंगु खः । गोर्खा मिडियाय् लामिछाने प्रबन्ध निर्देशक जुयाच्वंगु इलय् सूर्यदर्शन सहकारी, सानो पाइला सहकारीपाखें करोडौं तका त्यासा कयाः हिनामिना याःगु द्वपं लानाच्वंगु दु ।

लामिछाने लिसें पुलांम्ह डिआईजी छविलाल जोशी बन्जाडेयात नं बयानया निंतिं सःतूगु दु । बन्जाडे गोर्खा मिडियाया संचालक व थुकिया अध्यक्ष जीबी राईया व्यावसायिक साझेदार खः । अर्बौ तका ठगीया द्वपं लानाच्वंम्ह राई धाःसा थौंकन्हय् बेपत्ता दु ।