ने. सं. ११४४ कौलाथ्व पारू - नःलास्वनेगु

येँया सांसद रामवीर मानन्धरपाखें राजीनामा वामदेवयात अन्तर्घातया खतरा

येँ – नेपाल कम्युनिष्ट पार्टीया सांसद रामवीर मानन्धरं थः पार्टीया नेता वामदेव गौतमया लागिं सांसद पदं राजीनामा बियादीगु दु । गौतमयात येँनं त्याकाः सदनय् छ्वयेगु लागिं सांसद मानन्धरं राजीनामा बियादीगु खः । गौतमयात त्याका छ्वयेगु लागिं सांसद मानन्धरं राजीनामा बियादीसां येँया नेकपा कार्यकर्तात धाःसा उकिया विरोधय् वंगु खँ सीदुगु दु ।

नेकपाया स्थानीय पार्टी कमिटी सूत्रं धाः कथं सांसद मानन्धरं राजीनामा बिउसां गौतमया लागिं कार्यकर्ता परिचालन जुइगु सम्भावना धाःसा म्हो जक दु । यदि गौतम धाथें थ्व थासं दं वल धाःसा वय्कःयात कार्यकर्तापाखें अन्तर्घात समेत जुइफुगु संकेत नं सूत्रं बिउगु दु । आः चुनाव जुल धाःसा गौतम त्याइगु निश्चित मदु धासें सूत्रं चुनावय् छक्वः लहर वल धायेवं हाकनं अज्याःगु हे लहर वइ धाये मफइगु खँ नं धाःगु दु ।

यदि पार्टीं सांसद मानन्धरया राजीनामा स्वीकृत यात धाःसा उकियात थःपिंसं स्वीकार मयायेगु खँ पूर्व एमालेया छम्ह नेतां धयादीगु दु । ‘निर्वाचित जूम्ह मनूयात राजीनामा याकाः पराजित जूम्ह मनूयात त्याकेगु पार्टीया रणनीति हे गलत खः, थुकिं जनताया दथुइ बांलाःगु सन्देश वनी मखु,’ उम्हं नेतां धयादिल ।

पार्टीया थ्व पलाःयात येँया नेवाः कार्यकर्तातय्सं मेकथं नं विरोध याना हःगु दु । नेवाः बहुल क्षेत्रं पिने जिल्लाया नेतायात चुनावय् थने हयेगु ज्यां नेवाःतय्त अपमान याःगु धासें थुकिं स्वनिगः दुने नेवाः राजनीतिक कार्यकर्तातय् भविष्य व सम्भावनायात धमाधम संकुचित याना यंकाच्वंगु द्वपं बियाहःगु दु ।

थम्हं राजीनामा यानाः पिनेयापिं नेतातय्त चुनावय् थने हयेगु ज्या यात धकाः सामाजिक सञ्जालय् सांसद मानन्धर विरुद्ध नं व्यापक बिचाः प्रवाह याना हःगु दु । वय्कःयात सिद्धान्त व सोच मदुम्ह सांसद धासें थःत भोट बिउपिं मतदातातय्त वय्कलं अपमान यानादीगु बिचाः नं सामाजिक सञ्जालय् ब्यापक जूगु दु ।

सांसद पदं राजीनामा बीत वयकः छाय् तयार जुयादिल धइगु न्ह्यसः नं पिहां वःगु दु । वय्कःयात पार्टीं मेगु दत्या लिपा राष्ट्रिय सभाया सांसद दयेकेगु आश्वासन बिउगु कारणं वय्कः राजीनामा बीत तयार जुयादीगु हुइनाभुइना नं जुया वःगु दु । भाजु मानन्धरं थः पार्टीया इमान्दार कार्यकर्ता जूगुलिं थ्व राजीनामा वापत पार्टीं ‘छुं ला बी जुइ नि’ धकाः छगू अन्तर्वार्ताय् धयादीगु दु ।

वंगु चुनावय् थःगु हे गृहजिल्ला बर्दियाय् बूम्ह गौतमयात लिपा डोल्पां चुनाव त्याकाः सदनय् यंकेगु पार्टीया कुतः विफल जुइवं येँय् उकिया लागिं मेगु कुतः जूगु खः ।