यँयाः स्वयेत २५ म्ह नगर प्रमुखयात ब्वना

येँ (नेपालभाषा टाइम्स)- न्ह्यःने वयाच्वंगु यँयाः पर्व स्वयेगु लागिं स्वदँ न्ह्यः थें थुगुसी नं येँ महानगरपालिकां थःपिंलिसे भातृ स्वापू दुगु थीथी देय्या नगर प्रमुखतय्त ब्वनापौ छ्वःगु दु ।

येँ मनपा सूत्रया कथं मेयर बालेन्द्र साहं थुगुसी थीथी देय्या २५ म्ह नगर प्रमुखपिंत यँयाः स्वः वयेगु लागिं ब्वनापौ छ्वःगु खः । थुकी भारतया न्हू दिल्ली, चीनया ल्हासा, लान्जाउनिसें कयाः अमेरिका, जापान, जर्मनी, दक्षिण कोरिया व उत्तर कोरियाया थीथी नगर प्रमुखपिंत तकं ब्वनापौ छ्वःगु दु ।

येँ मनपापाखें मेयर विद्यासुन्दर शाक्यया पालय् यँयाःयात अन्तर्राष्ट्रिय रुपं प्रचार यायेगु लागिं थीथी नगरया प्रमुखपिंत येँय् ब्वनेगु ज्या जूगु खः ।

थ्वहे झ्वलय् पञ्चाङ्ग निर्णायक विकास समितिपाखें थुगुसी जुइगु यँयाः जात्राया साइत सार्वजनिक याःगु दु । समितिं बिउगु साइत कथं आः वइगु भदौ २२ गते बुधवाः सुथय् ७.१७ बजे हनुमानध्वाखाय् यःसिं थनीगु जूगु दु । यःसिं काः वनेगु लागिं थ्वहे वइगु भदौ १३ गते सुथय् ९.१७ बजे वन यात्रा जुइगु व वकुन्हु हे बहनी यःसिंयात माःगु सिमा पालीगु जुइ । भदौ १९ गते सुथय् ७.२४ बजे यःसिंयात नगर प्रवेश याकीगु ज्याझ्वः दु । यःसिं थनेवं येँय् दीप्याखं, लाखे, पुलुकिसि आदि नं पिहां वइ ।

उकथं हे भदौ २४ गते कुमारी रथयात्राया क्वःनेयाः, २५ गते थःनेयाः, २९ गते बुधवाः नानिचायाः व वकुन्हु हे बहनी ७.३३ बजे यःसिं क्वःथली । यःसिं क्वःथलेवं यँयाः पर्व नं क्वचाइ ।

सम्बन्धित बुखँ

LEAVE YOUR COMMENTS