संविधान कथं उप्रेतियात राजदूत दयेके मदइगु

येँ – नेपाल सरकारं भारतया लागिं राजदूत पदय् नियुक्त याःम्ह भाजु निलकण्ठ उप्रेतिया नियुक्ति विवादय् लाये फइगु सम्भावना ब्वलंगु दु । सरकारं वय्कःयात राजदूत पदय् नियुक्त याःसां संविधानय् निर्वाचन आयोगया प्रमुख आयुक्त वा आयुक्त जुइधुंकूपिं लिपा हानं मेगु सरकारय् नियुक्तिया लागिं ग्राह्य जुइ मखु धकाः न्ह्यथनातःगु कारणं वय्कःया पद संकटय् लाये फुगु खँ विज्ञ सूत्रं धाःगु दु ।

संविधानया धारा २४५ या उपधारा (८) य् ‘निर्वाचन आयोगया प्रमुख निर्वाचन आयुक्त व आयुक्त जुइधुंकूम्ह मनू अन्य सरकारी सेवाय् नियुक्तिया लागिं ग्राह्य जुइ मखु’ धकाः स्पष्ट उल्लेख यानातःगु दु । उकिं संविधानया थ्व धारा कथं उप्रेतिया नियुक्ति वदर जुइ फुगु खँ सूत्रं धाःगु दु ।

संविधान कथं सर्वोच्च अदालतया न्यायाधीश जुइधुंकूम्ह मनू नं लिपा छुं नं सरकारी सेवाय् नियुक्ति ग्राह्य जुइ मखु धयातःगु दु ।
थुपिं संवैधानिक निकायय् च्वनीपिं पदाधिकारीतय्सं भविष्यय् अज्याःगु नियुक्तिया लोभ यासें पदया दुरुपयोग यायेफुगु खँयात ध्यानय् तयाः संविधानय् थज्याःगु प्रावधान तयातःगु खः । न्हापाया संविधानय् थज्याःगु खँ मदुसां वर्तमान संविधानय् थ्व खँ दुथ्याकातःगु दु ।

सरकारं म्हिगः भारतया लागिं राजदूत पदय् निलकण्ठ उप्रेति व मलेसियाया लागिं उदयराज पाण्डेयात राजदूत नियुक्त यायेगु निर्णय याःगु खः । थुकी मध्ये उप्रेति झलनाथ खनाल प्रधानमन्त्री जुयादीगु इलय् साउदी अरेबियाया राजदूत जुयादीम्ह खः । वयां लिपा वय्कः थीथी गैरसरकारी संस्थाय् आवद्ध जुयाः ज्या यानादीगु खः । वय्कः आवद्ध संस्थात मध्ये छगू नीति प्रतिष्ठान नं खः । थ्व प्रतिष्ठान भारतीय स्वयंसेवक संघ व भारतया सत्तारुढ पार्टी भाजपालिसे सतीगु संस्था धायेगु याः । निर्वाचन आयोगय् उप्रेति प्रमुख आयुक्त जुयाच्वंगु इलय् संविधानसभाया चुनाव जूगु खः ।

वय्कःया थ्व नियुक्तियात कयाः मुद्दा लाये फुगु अथवा संसदया सुनुवाई समितिं हे पना बीफुगु खँ नं सूत्रं धाःगु दु । सुनुवाई समिति धाःसा गठन मजूनिगु कारणं सुनुवाईया ज्या छुं भचा लिबाये फुगु खँ नं धाःगु दु ।

नेपाःया जःलाखःला देय् भारत व चीनय् राजदूत मदुगु ताःई हे दयेधुंकल । चीनय् राजदूत मदयेक हे प्रधानमन्त्री ओलीं भ्रमण याःगुलिं व्यवस्थित मजूगु टिप्पणी समेत वःगु खः ।