बुंगद्यःया न्हवं क्वचाल, रथ दयेके ज्या लकडाउन लिपा जक

येँ – लकडाउनया दथुइ थौं सनिलय् बुंगद्यःया न्हवं क्वचाःगु दु । लगंख्यः दथुइ च्वंगु दबुली बुंगद्यःया मां यक्षयारनी मायदेवी देगः नापसं तयाः बुंगद्यःया न्हवं जूगु खः ।

लकडाउनया कारणं थौं बुंगद्यःया न्हयवं स्वःवःपिं धाःसा यक्व खनेमंत । अथे खःसां न्हवं स्वयेगु निंतिं पत्रकारतय् धाःसा हूलमूल खनेदुगु खः । बुंगःद्यःया न्हवं क्यनेगु निंतिं यलया कुमारी माजुयात नं हःगु खः ।

वर्षा व सहकालया द्यः धाइम्ह बुंगद्यःयात दँय्दसं चैतकृष्ण प्रतिपदा कुन्हु लगंख्यलय् न्हवं याकेगु याइ । न्हवं याकेबलय् मनोहरा तीर्थ, सिलु तीर्थ, गंगा तीर्थ, विष्णुमति तीर्थ व सपन तीर्थया लः हया न्हवं याकेमाःगु चलन दु । नेपाल संवत् ४३३ निसें जुजु रिपु मल्लं बुंगद्यःया न्हवं याकेगु चलन न्ह्याकूगु धाइ ।

बुंगद्यःया रथ जात्रा नं याकनं सुरु जुइत्यंगु दु । आः लकडाउनया कारणं बुंगद्यःया रथ दयेके ज्या धाःसा अन्योलय् लानाच्वंगु दु । गुथि संस्थान यलया प्रमुख राजन भुजुं लकडाउन चालेधुंकाः जक रथ दयेकेगु ज्या न्ह्याकेगु बारे सहलह जूगु खँ राससयात धाःगु दु । रथ दयेकेगु निंतिं माःगु सिँ, खिपः आदि धाःसा तयारी अवस्थाय् दुगु खँ नं वय्कलं धयादीगु दु ।

नेवाः पत्रकार राष्ट्रिय दबूया नायः सुरजवीर वज्राचार्यपाखें पाखें फेसबुकय् लाइभ यानादीगु भिडियो