लुम्बिनी विश्वविद्यालय विकासय् विशेष कुतः यायेत माग

यल – बौद्धविद्वानतय्सं नेपाःया छगू जक बौद्ध विश्वविद्यालय लुम्बिनी बौद्ध विश्वविद्यालयया विकासया निंतिं सरकारं विशेष कुतः यायेमाःगु खँय् बः बिउगु दु ।

लुम्बिनी बौद्ध विश्वविद्यालय व नेपाल परम्परागत बौद्ध धर्म संघं शनिवाः ग्वसाः ग्वःगु ‘लुम्बिनी बौद्ध विश्वविद्यालय विगत व वर्तमान’ विषयय् जूगु प्रचवन गोष्ठी न्ववानादीपिंसं थ्व विश्वविद्यालयय् पदाधिकारी नियुक्त यायेबलय् नं बौद्ध धर्मय् विशेष ज्ञान दुपिं बौद्ध विद्वातय्त जक प्राथमिकता बिइमाःगु माग नं याःगु खः ।

न्हापा छगू सामान्य भवन, छगू करोड बजेट व न्याम्ह शिक्षकतय्सं संचालन याःगु थ्व विश्वविद्यालयय् वंगु प्यदँया दुने उपकुलपतिया निवास, मिजं व मिस्तय् छात्रावास भवनया लिसें च्यागू भवन दयेके सिधयेधुंकूगु खँ नं ज्याझ्वलय् जानकारी बिउगु खः । न्हापा छगू करोड बजेट जुयाच्वंगु थ्व विश्वविद्यालयय् थौंकन्हय् १३ करोड बजेट थ्यनेधुंकूगु दु ।

थन थौंकन्हय् ३६ गू प्राज्ञिक उपाधी नीस्वनाः पठनपाठन यानाच्वंगु व थेरवाद, महायान व वज्रयान बौद्धधर्मया प्राज्ञिक गुरु योजना दयेकेधुंकूगु जानकारी नं ज्याझ्वलय् बिउगु खः ।ज्याझ्वलय् न्ववानादिसें विश्वविद्यायया उपकुलपति डा. नरेशमान वज्राचार्यं नेपाःया लुम्बिनी, खास्ती, स्वयम्भु, नमोबुद्ध आदि विषयय् विद्वानत उत्पादन यायेगु केन्द्रया रुपय् विश्वविद्यालययात विकास यानागु खँ कनादिल ।

थौंकन्हय् विश्वविद्यालयय् झिंनिगू विभाग स्थापना यानाः पाली, संस्कृत, तिब्बत भाषां ब्वनेगु सुविधा नं बियातःगु दुसा याकनं हे चिनियाँ भासं नं बौद्ध धर्म अध्ययन यायेगु ह्वःताः बीत्यंगु दु ।ज्याझ्वलय् न्ववानादिसें नेपाल भिक्षु महासंघया महासचिव भिक्षु कोडण्यं लुम्बिनी बौद्ध विश्वविद्यालयय् हाथ्या व ह्वःताः नितां दुगु खँ कनाबिज्यात ।

वसपोलं विश्वविद्यालयया पूवंक विकासया निंतिं सरकारं प्राथमिकता बिइमाः खँ न्ह्यथँसें बुद्ध धर्मया अनुसन्धान याइपिं विद्यार्थीतय्त ब्वनेगु ह्वःताः व पूर्वाधार तयार यानाबीमाःगु खँय् बः बियादिल ।अथेहे बौद्ध विद्वान आचार्य जिग्दोल लामां मानव जीवनय् सुखी जीवन म्वायेत बुद्ध दर्शनया अध्ययन आवश्यक जूगु खँ कनादिल । बौद्ध विद्वान डा. बज्रराज शाक्यं सुं नं प्राणीयात दुःखया मुक्तिया निंतिं बुद्ध धर्म आवश्यक दु धयादिल ।