ने. सं. ११४४ कौलाथ्व पारू - नःलास्वनेगु

सरकारया वहस क्वचाल, ओलीया शुरु जुल

येँ – प्रधानमन्त्री केपी शर्मा ओलीं यानादीगु संसद भंग विरुद्ध संवैधानिक अदालतय् न्ह्यानाच्वंगु रिटय् सरकारी पक्षया वहस म्हिगः क्वचाल । नापं म्हिगःनिसें हे आः प्रधानमन्त्री ओलीया निजी कानुन व्यवसायीपाखें वहस शुरु याःगु दु । उकिया आरम्भ वरिष्ठ अधिवक्ता सुशील पन्तं यानादीगु खः ।

म्हिगः वहसया शुरु यासें पन्तं प्रधानमन्त्री नियुक्त यायेगु राष्ट्रपतिया विशेष अधिकार जूगु तर्क तयादीगु खः । वय्कलं संविधानया धारा ७६ (५) कथं प्रधानमन्त्री नियुक्त यायेगु राष्ट्रपतिया विशेष अधिकार खः धासें धयादिल, ‘संसदीय शासन पद्धतिइ प्रधानमन्त्री नियुक्त यायेगु राष्ट्रपतिया विशेष अधिकार खः ।’

न्ह्याम्हेस्यां प्रधानमन्त्री दावी याःसां नं राष्ट्रपतिं नियुक्त यायेमाःगु खः ला धासें वय्कलं न्ह्यसः तयादिल, ‘राष्ट्रपतिं न्ह्याग्गु दावी वःसां अन हे छ्वयेमाःगु खःला ? न्हापा सुयागु दावी वल धायेबलय् ओलीया दावी वल, तर थन ओलीया तथ्यय् दुहां वनाः अस्वीकार यायेमाःगु, मेपिनिगु गुकथं स्वीकार या धायेफइ ? आधारय् विश्वास यायेगु खःसा तथ्य माः, राष्ट्रपति तथ्यय् दुहां वने मदु धइगु ला जुइ मखु ।’

उकथं हे वय्कलं राष्ट्रपतियात मुद्दा लगे मजुइगु तर्क यानादिसें संविधानया धारा ७६ कथं सांसद निर्दलीय जुइ धकाः तर्क यायेगु खःसा उगु खँ संविधानय् छाय् मच्वल धकाः न्ह्यसः नं थनादिल । वय्कलं धयादिल, ‘धारा ७६ (५) कथं सांसद निर्दलीय जुइगु खःसा व खँ संविधानय् च्वये म्वाःला ? धारा ७६ (५) स निर्दलीय जुइ धकाः च्वयातःगु दु ला ?’

उकथं हे मेम्ह वरिष्ठ अधिवक्ता सुरेन्द्र भण्डारीं संविधानया धारा ७६ (५) कथं प्रधानमन्त्री दावी यायेगु निंतिं निर्विवाद आधार दयेमाःगु तर्क यानादिल । वय्कलं धारा ७६ (५) कथं प्रधानमन्त्री दावी याइम्ह सांसदं थःके दुगु विश्वासया मत पूरा कार्यकाल कायम याना तये फइगु आधार दयेमाःगु तर्क नं यानादिल ।

वय्कलं धयादिल, ‘विश्वासया मत थौं दु कन्हय् भंग जुइ मजिउ । शेरबहादुर देउवां पूरा कार्यकाल उगु मत कायम याना तये फइ धकाः गुकथं यकिन यायेफइ ? धारा ७६ (५) स आधार दयेकेगु निंतिं विश्वसनीयता प्रमाणित जुइमाः, छम्हेस्यां १५३ म्ह सांसदया हस्ताक्षर ज्वना वनेगु मेम्हस्यां १४९ म्ह सांसदया हस्ताक्षर ज्वना वनेगु, राजनीतिक समस्या ब्वलंकेगु व समाधान याये मफुत धकाः अदालतया खापा खिउँ वनेगु ला ?’

प्रधानमन्त्री नियुक्त जुइगु निंतिं आधार न्ह्यब्वयेगु झ्वलय् संविधान कथं विश्वसनीय व निर्विवाद जुइमाःगु तर्क यासें वय्कलं अज्याःगु कारण मदुगुलिं राष्ट्रपतिं निम्हेसितं प्रधानमन्त्री नियुक्त मयाःगु खः गुगु संविधान कथं पाय्छि खः धकाः तर्क तयादिल ।