थनिंनिसें चुनावी तामझाम

येँ (नेपालभाषा टाइम्स)- मंसिर ४ गते जुइगु चुनावया तामझाम थनिंनिसें तिनि खने दइगु जूगु दु । राजनीतिक दलतय्सं थनिंनिसें तिनि चुनाव केन्द्रित खुल्ला आमसभा याये दइगु जूगुलिं थनिंनिसें दलतय्गु तामझाम खने दयेत्यंगु खः । दलतय्सं थनिंनिसें मंसिर १ गते तक सभा, कोणसभा याये दइ । वयां लिपा चुनाव प्रचारया ज्या बन्द जुइ ।

म्हिगः तक दलतय्सं खुल्ला सभा याये मदइगु व घरदैलो कार्यक्रम जक याये दइगु व्यवस्था यानातःगु दु । घरदैलो वनेबलय् नं यक्व मनू ज्वना वने मदइगु, पार्टीया ध्वाँय् क्यने मजिउगु, माइकिङ याये मजिउगु, बाजं थाना वने मजिउगु नियम लागू यानातःगु खः ।

उम्मेदवारतय्त तयातःगु थ्व प्रतिबन्ध थनिंनिसें धाःसा फुकुवा जूगु दु । तर सभा यायेबलय् नं २५ पु स्वयां अप्वः ध्वाँय् ब्वयेके मदइगु व सभा यायेबलय् दबू दयेकूगु ल्याःचाः समेत निर्वाचन आयोगयात बुझे याये हयेमाःगु खँ धाःगु दु । निर्वाचन आयोगयात अज्याःगु ल्याःचाः १५ न्हुया दुने बुझे याये हयेमाःगु व्यवस्था आयोगं यानातःगु दु ।

यदि थुपिं आचार संहिता पालना मयात धाःसा आयोगं स्पष्टीकरण न्यनेगु निसें कयाः उम्मेदवारी खारेजी तकया कारवाही याये फइगु खँ धाःगु दु । आचार संहिता उल्लंघन यात धकाः वःगु उजुरीया लिधंसाय् आयोगं आः तक ७१ म्ह व्यक्ति व संस्थायात स्पष्टीकरण कायेधुंकूगु दु । आयोगं कारवाही यायेबलय् उकिया विरुद्ध मुद्दा मलाकेगु बारे नं बिचाः यानाच्वंगु दु ।