रुपन्देही व झापाय् थप ९म्हेसित कोरोनाया संक्रमण

येँ – नेपाःया रुपन्देही व झापाय् थप ९म्हेसित कोरोना भाइरसया संक्रमण जूगु दु । स्वास्थ्य तथा जनसंख्या मन्त्रालयया प्रवक्ता डा. विकास देवकोटां झापाय् ८म्ह व रुपन्देहीइ छम्हेसित संक्रमण जूगु पुष्टि यानादीगु दु ।

झापाय् १७, १८, १८, २०, २०, २३, ५२ व ५५दँया मिजंतय्त संक्रमण जूगु खः । झापाया कचनकवलय् च्वंगु लक्ष्मी देवकोटामावी क्वारेन्टाइनय् च्वनाच्वंगु दु ।

अथेहे रुपन्देहीइ २७दँया मिजंयात संक्रमण जूगु दु । उम्ह मिजं लुम्बीनीया श्रीलंकन गेष्टहाउज क्वारेन्टाइन च्वनाच्वंगु दु ।

थ्व नापं नेपालय् कोरोना भाइरसया संक्रमिततय् ल्याः ४५३म्ह थ्यंगु दु । उकी मध्ये ३८३म्ह मिजंत खःसा ७०म्ह मिसात खः । कोरोनाया संक्रमण नेपाःया ३८गू जिल्लाय् थ्यंगु खँ मन्त्रालयं धाःगु दु ।