संस्कृति शिरोमणि जोशीया स्वक्वःगु ज्याःजंक्व
यल(नेपालभाषा टाइम्स)÷संस्कति शिरोमणि हरिराम जोशीया स्वक्वःगु ज्याःजंक्व क्वचाःगु दु । वंगु सोमवाः उमेरं ८८ दँ च्याला, न्यान्हु व ८ पलाखय् क्यंगु दिं संस्कृति शिरोमणि जोशीया स्वक्वःगु ज्याःजंक्व याःगु खः ।
धार्मिक विधि परम्पराकथं पुजा यानाः वय्कःया स्वक्वःगु ज्याःजंक्व याःगु खः । ज्याःजंक्वया झ्वलय् वय्कःया खतय् (रथय्) तयाः देय् चाःहिकूगु खःसा उगु इलय् वय्कःयात नःत्वाःस्थित जलविनायकया नं दर्शन याकूगु खः ।
नेवाः परम्पराकथं स्वक्वः जंक्वया इलय् यायेमाःगु दक्वं विधि पूवंकाः याःगु खःसा थ्व झ्वलय् वय्कःयात छेँया मूलुखां मखसे झ्यालं दुचायेकूगु खः ।
नेवाः समाजय् ७७ दँ न्हय्ला, न्हय्न्हुया दिनय् न्हापांगु ज्याःजंक्व व ८३ दँ प्यला व प्यन्हुया दिनय् निक्वःगु ज्याःजंक्व यायेगु परम्परा दया वयाच्वंगु दु ।
LEAVE YOUR COMMENTS