निगू कोरियाया शिखर वार्ता परमाणु निशस्त्रीकरणया निंतिं पहल

उत्तर कोरियाया नेता किम जङ अन व दक्षिण कोरियाया राष्ट्रपति मून जे इन दथुइ मंगलवाः उत्तर कोरियाया राजधानी प्योङयाङय् शिखर वार्ता जुइगु जूगु दु । निम्ह नेता दथुइ थ्व स्वक्वःखुसी शिखर वार्ता जुइत्यंगु खःसा प्योङयाङय् न्हापांखुसी जुइत्यंगु खः । थ्वयां न्ह्यः किम व मून दथुइ निगू कोरियाया सीमाय् वार्ता जुया वयाच्वंगु खः ।

शिखर वार्ताय् दक्षिण कोरियाया नांजाःपिं व्यापारित नं सहभागी जुइगु खँ दक्षिण कोरियाली राष्ट्रपति मूनं पुष्टि यानादीगु दु । शिखर वार्ताया तयारीया निंतिं दक्षिण कोरियाली अधिकारी, प्राविधिकत व पत्रकारत आइतवाः हे प्योङयाङ थ्यनेधुंकूगु दु । मूनं वार्ताय् उत्तर कोरियायात आर्थिक ग्वाहालि बियाः वयात परमाणु अस्त परित्याग याकेगु निंतिं खँल्हाबल्हा जुइगु संकेत बियादीगु दु ।

थौंकन्हय् संयुक्त राष्ट्र संघया प्रतिबन्ध फयाच्वंगु उत्तर कोरियां दक्षिणया प्रस्ताव अःपुक माने याइगु अनुमान यानातःगु दु । अमेरिका नं प्योङयाङयात आर्थिक ग्वाहालि बियाः परमाणु निशस्त्रीकरण ज्याय् ठोस प्रगती जूगु स्वये चाहे जुयाच्वंगु खँ धाःगु दु ।

वंगु अप्रिलय् न्हापांखुसी छगू दशक लिपा उत्तर व दक्षिण कोरियाली नेतातय् दथुइ वार्ता जूगु खः । सन् १९५३ य् हे निगू कोरिया दथुइ युद्ध क्वचायेधुंकूसां प्राविधिक रुपं निगू कोरिया दथुइ अझ नं युद्धया अवस्था दनि ।