ने. सं. ११४३ चौलाथ्व सप्तमी -

सांघाईलय् कोरोना संक्रमणं स्वम्ह सित

एजेन्सी- चीनया सांघाइलय् कोरोना संक्रमणं यानाः स्वम्ह मनू सीगु दु । सांघाइया स्वास्थ्य आयोगं बिउगु जानकारीकथं ८९ निसें ९१ दँ दुपि स्वम्ह ज्याथपिं कोरोना संक्रमण जुयाः सीगु खः ।

सांघाइलय् कोरोना संक्रमण यानाः न्हापांखुुसी मनू सीगु चीन सरकारया दाबी दु, तर अन्तर्राष्ट्रिय समुदायं थ्व दाबी शंकास्पद धयाच्वंगु दु । सीपिं स्वम्हेसिनं कोरोना विरुद्धया खोप मकाःनीगु खँ धाःगु । अधिकारीतय्सं बिउगु जानकारीकथं सांघाइलय् ६० दं च्वय्यापिं ३८ प्रतिशतं जक कोरोनाया खोप कायेधुंकूगु दु ।

वंगु मार्च १ तारिखनिसें कोरोना संक्रमण अप्वया वःगु कारणं थन लकडाउन तयातःगु दु । गुन्हुया नितिं धकाः तःगु लकडाउन लछि पुले धुंकूगु दु । चीनया प्रमुख अर्थिक शहर सांघाइलय् न्हियान्हिथं औसत २५ द्वलं मल्याक मनूतय्त कोरोना संक्रमण खनेदयाच्वंगु दु ।
चीनं थौकन्हय् जिरो कोभिड नीति नालाः ज्या यानाच्वंगु दु ।

चीनय् गनं नं कोरोना संक्रमण खनेदत धाःसा प्ररा सहरया नागरिकतय्गु कोरोना परिक्षण यायेगु, थीथी प्रतिबन्ध तयेगु व लकडाउन तयेगु जुयाच्वंगु दु । तर सरकारया थ्व नीतिं स्थानीय मनूत धाःसा आक्रोशित जुयाच्वंगु खनेदु । मनूतय्सं सामाजिक सञ्जालपाखें प्रतिबन्ध व लकडाउनं यानाः खाद्यान्न आपूर्तिया समस्या जुयाच्वंगु धयाच्वंगु दु । विश्लेषकतय्सं धाःकथं सांघाइ नगरवासीतय्सं मुनातःगु खाद्यान्न ज्वलं फुइगु अवस्थाय् थ्यनेधुंकूगु दु ।

भारतय् नं संक्रमण थहां वन
एजेन्सी- भारतय् कोरोना संक्रमण दर हाकनं थहांवंगु दु । छवाः न्ह्यःनिसें भारतय् कोरोना संक्रमण थहां वनाः सोमवाः थ्यंमथ्यं ९० प्रतिशत वृद्धि जूगु दु । भारतया स्वास्थ्य मन्त्रालयं बिउगु जानकारीकथं सोमवाः निद्वः १८३ म्हेसिके कोरोना खनेदुगु खः । आइतवाः सिबें थ्व ८९.८ प्रतिशतं अप्वःगु खः । आइतवाः ११५० म्हेसिके कोरोना खनेदुगु खः । भारतय् आः कोरोना संक्रमण दर ०.३१ प्रतिशतं थहां वनाः ३ प्रतिशत थ्यंगु दु । दिल्ली व दिल्लीलिक्कसं लाःगु थीथी शहरय् कोरोना संक्रमण थहां वंगु खः ।