अस्ट्रेलियाया ब्रिसबेनय् नं लकडाउन

एजेन्सी- अस्ट्रेलियाया क्विन्सल्याण्डया राजधानी ब्रिसबेनय् नं लकडाउन तःगु दु । कोरोना भाइरसया डेल्टा भेरियन्ट संक्रमण अप्वया वंगुलिं ब्रिसबेनय् च्वंगु थीथी शहरय् शनिवाः स्थानीय ईकथं ४ ताः निसें लकडाउन तःगु खः ।

ब्रिसबेनय् कोरोना शुरु जुइधुंका न्हापांखुसी कडा लकडाउन याःगु खः । लकडाउनय् मनूत अत्यावश्यक ज्या बाहेक पिहां वयेमदुगु, पसः वनेत, वासः यायेत व व्यायाम यायेत जक पिहां वयेदुगु, छेँ नं १० किलोमिटर सिबें तापाक वनेमदुगु व पिहां वयेबलय् अनिवार्य मास्क तयेमाःगु धाःगु दुु । ब्याहा व सीथाय् झिम्हं अप्वः मनू मुने मदुसा सिनेमा हल, जिमखाना व सैलुन नं बन्द याःगु दु । लकडाउन आःयात स्वन्हुया निंतिं जक तःगु दु ।

क्विन्सल्याण्डय् वंगु बिहिवाः खुम्हेसिके कोराना खनेदयेवं शनिवाः निसें लकडाउन यायेगु घोषणा याःगु खः । क्विन्सल्याण्डया स्वास्थ्य प्रमुख अधिकारी जेनेट योङं बिउगु जानकारीकथं कोरोना खनेदुपिं मनूतय्गु सम्पर्कय् वःपिनिगु कन्ट्याक्ट ट्रेसिङ जुयाच्वंगु दु । स्वास्थ्य प्रमुख योङं कोरोना दर थहां वनेफुगुलिं कोरानाया लक्षण खनेदुपिं सकसितं परीक्षण यायेत नं इनाप याःगु दु ।

अस्ट्रेलियाया सिड्नीइ नं लछिया निंतिं कडा लकडाउन तयातःगु दु । सिड्नीइ लकडाउन कार्यान्वयन याकेत सेना नं परिचालन यानातःगु दु । सेना परिचालन याःगुलिं उकीया विरोध नं जुयाच्वंगु दु ।