भुखाय् पीडिततय्त बी धाःगु निब्र्याजी त्यासा लागू जुइमफु
येँ – भुखाचं पीडित पिंत सरकारं मंकाः जमानी वा धितो जमानीइ निब्र्याजी त्यासा बीगु धकाः दछि न्ह्यव हे नीति हःगु खःसां आःतक थज्याःगु त्यासा धाःसा बिउगु मदुनि । सरकारं दछि न्ह्यव भुखाचं पीडितपिंत छेँ दनेगु निंतिं ब्याज पुलेम्वायेक स्वंगू लाख तका त्यासा बीगु नीति हःगु खः । तर थज्याःगु त्यासा आःतक बीमफुनिगु खँ पुनर्निर्माण प्राधिकरणं धाःगु दु ।
प्राधिकरणया कथं थज्याःगु त्यासा म्हयेगु ज्याय् जोखिम यक्व दुगुलिं वित्तीय संस्थात त्यासा बीत तयार जुयाच्वंगु मदु । वाणिज्य व विकास बैंकय् मंकाः जमानीइ त्यासा बीगु व्यवस्था मदु धकाः निब्र्याजी त्यासा बीत अस्वीकार यायेवं वंगु असोजय् सरकारं कार्यविधि तकं संशोधन यायेधुंकूगु खः । थुकी सार्वजनिक जमानी वा पीडितं छेँ दयेकेत्यंगु जग्गा हे बरः तयाः त्यासा बीगु व्यवस्था याःगु खः । अथे खःसां वित्तीय संस्थातय्सं आःतक थज्याःगु त्यासा बियाच्वंगु मदुनि ।
त्यासा म्हयेगु ज्याय् जोखिम यक्व दुगुलिं वित्तीय संस्थात त्यासा बीत तयार जुयाच्वंगु मदु
राष्ट्रिय पुनर्निर्माण प्राधिकरणया प्रवक्ता यमलाल भुसालं बिबिसीलिसे खँ ल्हासें धाःगु दु, ‘सामुहिक जमानी वा धितो जमानीइ निब्र्याजी त्यासा बीगु कार्यविधि कथं आःतक त्यासा पिहां वंगु मदुनि । थ्व बारे बैंकतलिसे जिमिसं सहलह याना, तर म्याद सिधयेधुंकाः नं त्यासा म्हयेगु सुनिश्चितता बैंकतय्सं चाहे जुयाच्वंगु दु । थ्व हे खँ मिले मजुयाः आतक त्यासा बीफयाच्वंगु मदुनि ।’
थ्व कार्यविधिइ त्यासा बिउगु बैंक वा वित्तीय संस्थायात त्यासाया ब्याज, बिमा लगायतया शुल्क हरेक स्वलाय् राष्ट्र बैंकं दयेकातःगु कोषपाखें बीगु व्यवस्था यानातःगु दु । त्यासाय् वयेमाःगु ब्याज व शुल्क सुनिश्चित जूसां लगानी हे उठे यायेगु सुनिश्चितता बैंकतय्सं मालाच्वंगु दु ।कार्यविध लागू यायेगु सम्भावनायात कयाः सरकारं निक्षेप तथा कर्जा सुरक्षण कोषलिसे परमार्श याःगु खः ।
प्रवक्ता भुसालं धयादीगु दु, ‘न्हय्गू लाख स्वयां अप्वः लाभग्राहीतय्सं थ्व कार्यविधि कथं स्वंगू लाख निब्र्याजी त्यासा काल धाःसा थज्याःगु त्यासाया सुरक्षण यायेगु क्षमता निक्षेप व कर्जा सुरक्षण कोषयाके मदुगु खनेदत ।’पुनर्निर्माण प्राधिकरणं स्वनिगः दुने छेँ दयेकेत २५ लाख व स्वनिगलं पिने १५ लाख तका २ प्रतिशत ब्याजं त्यासा बीगु धकाः हःगु कार्यविधि तकं प्रभावकारी रुपं न्ह्याः वनेफयाच्वंगु मदु । प्राविधिक पक्षयात ध्यानय् मतसे लोकंह्वाकेगु निंतिं जक सरकारं हःगु कारणं थज्याःगु नीति प्रभावकारी जुइमफयाच्वंगु खँ धाःगु दु ।
LEAVE YOUR COMMENTS