काठमाडौं सुनचाँदी व्यवसायी संघया आयकर सम्बन्धी अन्तरक्रिया ज्याझ्वः

ये- काठमाडौं सुनचाँदी व्यवसायी संघया ग्वसालय् आयकर सम्बन्धी छगू अन्तक्र्रित्मक ज्याझ्वः जुल । संघया ग्वसालय् नेपाल सरकारं करय् याःगु संशोधन सम्बन्धी विषययात कयाः वंगु शनिवाः आयकर शिक्षा व अन्तक्र्रिया ज्याझ्वः जूगु खः ।

संघया अध्यक्ष सुरेश शाक्यया सभापतित्वय् जूगु ज्याझ्वलय् मूपाहांकथं झायादीम्ह आयकर विभागया महानिर्देशक शोभाकान्त पौडेलं लिच्छवी व मल्लकालीन इलंनिसें हे लुँवहया व्यवसायीतय्सं कालीगढी पेशायात व्यवासयीकरण यानाः नेपालय् आर्थिक ख्यलय् योगदान बिया वयाच्वंगु खँ कनादिल ।

वय्कलं नेपाःया आर्थिक ख्यलय् लुँवह व्यवासायं यक्व हे योगदान बिया वयाच्वंगु दु धासें थुगु ख्यःया व्यवसायीपिं प्रशंसा याये बह जू धयादिल ।

राजस्व विभागं करदातापिनिगु अडिट सही व सहज ढंगं यायेमाःगु व करदातातय्त गुगुं कथंया दुःख बीगु ज्या याये मजिउ धासें वय्कलं धयादिल, ‘यदि गन नं छुं नं खँय् राजस्व विभागया कर्मचारीतय्सं दुःख बीगु ज्या यात धाःसा तप्यंक हे थःत मोबाइलय् फोन यानादिसँ, यदि व्यवसायीपाखें द्वंगु खःसा थःपिंसं हे मिले यानादिसँ, मखु कर्मचारीपाखें द्वंगु खःसा तत्काल वयात नियमकथं कारवाही यायेगु जुइ ।’

अन्तक्र्रिया ज्याझ्वलय् आयकर शिक्षायात कयाः व्यवसायीपिंसं न्यंगु न्ह्यसःया लिसः विभागया निर्देशक मित्रलाल अधिकारी व शाखा अधिकारी प्रदीप रेग्मीं बियादीगु खः ।

संघया सह कोषाध्यक्षनापं ज्याझ्वःया संयोजक प्रमिल स्थापितं ज्याझ्वः यायेमाःगुया कारण स्पष्ट यासें संघ न्ह्याबलें नं थःपिनिगु व्यवसायया कर पुलेत तयार दु, तर थःपिंत व्यवसाय यायेगु वातावरण नं दयेका बीमाः धयादिल । व्यवसायीतय्त अनावश्यक दुःख बीगु व पंगः वइगु छुं नं कथंया ज्या मयायेत इनाप यासें थःपिंसं कर पुलेधुंकाः राज्यपाखें छु गज्याःगु सुविधा दइ धइगु न्ह्यसः तयादिल ।

‘थौंकन्हय् थःपिंसं स्थानीय, जिल्ला, प्रदेश व केन्द्र यानाः प्यंगू थासय् कर पुलाच्वनागु दु, तर कर पुलागु वापत राज्यं खनेदयेक व्यवसायीतय्त छुं छुं हे सुविधा बियाच्वंगु धाःसा मदु’, वय्कलं धयादिल ।
लुँवहया व्यवसाययात भंसारनिसें सम्पत्ति शुद्धिकरण धकाः महालेखा परीक्षकया ज्याकुथिंतकं थुकियात स्वया वयाच्वंगु जूसां व्यवसाय यायेत हे थाकुया वनाच्वंगु अवस्थाय् नं थःपिंसं याना वयाच्वनागु व्यवसायया कर गुलि खः, उलि हे पुलेत तयार जुयाच्वनागु व्यवसायीतय् धापू दु ।

थःपिं कर पुलेत तयार जूथें कर अधिकृततय्सं नं थुकिया विषयय् पूर्ण रुपं जानकारी बीमाःगु व थथे जुल धाःसा व्यवसायीत मर्काय् लाइमखु धइगु व्यवसायीतय् धापू खः ।

ज्याझ्वलय् नेपाल सुनचाँदी व्यवसायी महासंघया नायः माणिकरत्न शाक्य, महासंघया विशिष्ट सदस्य मणिरत्न शाक्य, उपाध्यक्ष नापं निवर्तमान नायः महेन्द्ररत्न शाक्य, महासचिव धर्मसुन्दर वज्राचार्यलिसेंया व्यक्तित्वपिंसं व्यवसायीतय्त जुयाच्वंगु थीथी समस्यायात कयाः थःथःगु नुगःखँ तयादीगु खःसा नायः शाक्यं मूपाहां, पाहांपिंत मतिनाया चिं लःल्हानादीगु खः ।

सम्बन्धित बुखँ

LEAVE YOUR COMMENTS