ने. सं. ११४४ कौलाथ्व पारू - नःलास्वनेगु

हाकनं बन्द सरकारी उद्योग चायेकेगु खँ

येँ – बन्द जुयाच्वंगु सरकारी उद्योग विराटनगर जुट मिल, हेटौंडा कपडा उद्याग, चिनि कारखाना हाकनं चायेकेगु तयारी सुर जूगु दु । उद्योग तथा वाणिज्य मन्त्री मातृका यादवं सार्वजनिक निजी साझेदारीया ढाँचां थुपिं उद्योगत हाकनं संचालन यायेगु सरकारी लक्ष्य दुगु खँ धयादीगु दु ।

मेखे सरकारया मन्त्रीं बन्द जुयाच्वंगु उद्योग चायेकेगु धयाच्वंसां विज्ञतय्सं धाःसा थज्याःगु उद्योग चायेकाः लबः मजुइगु दावी यानाच्वंगु दु । विज्ञतय्सं सरकारं घाटा जूगु फुक्क बेहोरे याये तयार जूसा जक निजी क्षेत्रय् थुकी लगानी याइगु खँ धयाच्वंगु दु । सरकारं घाटा ब्यहोरे यायेगु खःसा जक थज्याःगु उद्योग चायेकेगु बांलाइगु खँ उमिसं धयाच्वंगु दु ।

खय्त ला आःया न्ह्यःया सरकारतय्सं नं बन्द उद्योग संचालन यायेगु धयावंगु खः । न्हूगु सरकार वयेवं बन्द उद्योग हाकनं चायेकेगु व औद्योगिकरण मार्फत रोजगरी बीफइगु खँ धायेगु यानाच्वंगु दु । अथे खःसां आः सुं सरकारं नं बन्द जूगु उद्योग चायेकफुगु मदुनि ।

बाबुराम भट्टराई थः हे प्रधानमन्त्री जुयाच्वंगु इलय् व लिपा उद्योग मन्त्री जूपिं नवीन्द्रराज जोशी व महेश बस्नेतं नं थ्व विषयया प्राथयिमकता बियाः ल्ह्वंगु खः । तर सुया पालय् नं बन्द जुयाच्वंगु उद्योग चायेकेफुगु मदु । आः नं मन्त्री यादवं धयाच्वंगु थ्व खँयात सुनानं विश्वास यानाच्वंगु दु । मन्त्री यादवं धाःसा पुलांगु सरकारं न्ह्यःने हःगु खँया हे थःपिंसं च्वन्ह्याकेत्यनागु खँ धयादीगु दु ।

वय्कलं बिबिसीलिसे खँल्हासें धयादीगु दु, ‘दुगु कलकारखना चायेकाः स्वदेशय् हे रोजगारी सृजना यायेगुया विकल्प मदु । उकिं थ्व सरकारया न्हापांगु प्राथमिकता हेटौंडा कपडा उद्योग, गोरखकाली रबर उद्योग, चिनि कारखाना व कृषि औजार काखाना निं चायेकेगु जुइ ।’अथेहे सार्वजनिक साझेदारीइ उद्योग चायेकेगु तयारी जुयाच्वंगु खँ नं उद्योग मन्त्रालयया सचिव यमकुमारी खतिवडां धयादीगु दु ।

तर पुलांम्ह अर्थसचिव रामेश्वर खनालं न्हापा नं थज्याःगु उद्योग संचालनय् हयेगु कुतः जूगु, तर थुकिं राज्यया ढुकुटीइ भार बीगु जक ज्या याःगु अनुभव कनादी ।खनालं धयादिल, ‘बुटवल धागोयात निक्वः तक संचालन यायेगु कुतः याःगु खः । थ्यंमथ्यं छगू अर्ब ति खर्च जुल, तर उद्योग संचालनय् हयेमफुत । थज्याःगु रुग्न उद्योग चले ला यायेफइ, तर सरकारं ध्यबा बियाः घाटा पूवंकेगु खःसा जक ।’

ताःई लिपा नवीन्द्र राजया पालय् नेपाल औषधि लिमिटेड संंचालनय् वःसां थ्व प्रभाकारी जुइमफुनि ।बन्द जुयाच्वंगु उद्योगया मेसिनरी सामान तसकं पुलां जूगुलिं संचालनय् वःसां निजी ख्यःलिसे प्रतिस्पर्धा यायेमफइगु खँ यक्वसिनं धाःगु दु । अथेहे स्वदेश दुने कच्चा पदार्थ उत्पादन जुइगु बन्द जुयाच्वंगु अवस्थया् पिनें टिकट हयेबलय् विदेशं हयेबलय् स्वयां म्हो मूल्यय् उत्पादन यायेगु हाथ्याः नं दु ।

न्हापा स्वदेशय् आवश्यक जूगु थीथी सामानया आपूर्ति यापिं थीथी सरकारी उद्योगत राजनीतिक हस्तक्षेप व वया राजनीतिक भर्ती कन्दं दयेकूगुलिं टाट पल्टछे जुयाच्वंगु खः ।