
येँ – तःभुखाचं क्षति जूगु निजी आवास पुनःनिर्माणया जिम्मा स्थानीय तहयात बीगु जूगु दु । राष्ट्रिय पुनःनिर्माण प्राधिकरणं २०७२ साल बैशाख १२या तःभुखाय् व वयां लिपाया पराकम्पं क्षतिग्रस्त जूगु निजी आवास पुनःनिर्माण यायेगु जिम्मा स्थानीय तहयात बीगु निर्णय याःगु खः ।
प्रधानमन्त्री केपी शर्मा ओलीया अध्यक्षताय् छुं दिं न्ह्यः च्वंगु प्राधिकरण निर्देशक समितिया बैठकं उकथंया निर्णय याःगु खः । बैठकं ज्याया प्रमाणीकरण व निरीक्षण यायेगु ज्या धाःसा प्राधिकरणया हे जिल्ला तहया ज्याकूपाखें यायेगु निर्णय नं याःगु दु ।
प्राधिकरणया प्रमुख कार्यकारी अधिकृत सुशील ज्ञवालीं स्थानीय तहय् जनप्रतिनिधि वयेधुंकूगु अवस्थाय् पुनःनिर्माणया ज्यायात प्रभावकारी रुपं न्ह्यःने यंकेत स्थानीय तहपाखें हे न्ह्याकेगु निर्णय जूगु जानकारी बियादीगु दु ।
अथे हे उगु बैठकं थौंकन्हय् जुयाच्वंगु दक्वं पुनःनिर्माण सम्बन्धी ज्यायात प्राधिकरण मातहतय् हयेगु निर्णय नं याःगु दु । पुरातत्व बाहेकया पुनःनिर्माणया दक्वं ज्या प्राधिकरण अन्तर्गत हयाः व हे कथं ज्या न्ह्याकेगु व थ्व स्वयां न्ह्यः निर्देशक समितिया बैठकं याःगु निर्णययात नं कार्यान्वयन यायेगु निर्णय जूगु वय्कलं कनादिल ।
LEAVE YOUR COMMENTS