इटहरीइ नेवाः पुरोहित तालिम

येँ – नेवाः देय् दबू प्रदेश नं. १या ग्वसालय् सुनसरीया इटहरीइ गुभाजु (पुरोहित) प्रशिक्षण तालिम ज्याझ्वः न्ह्याःगु दु । देय् दबूया प्रदेश नं. १ या कार्यवाहक संयोजक भाजु इन्द्रबहादुर श्रेष्ठया सभापतित्वय् जूगु ज्याझ्वःया उलेज्या प्रदेश नं. १ या प्रमुख प्रा. डा. गोविन्द तुम्बाहाङजुं यानादीगु खः । थ्व हे माघ १५ गतेनिसें न्ह्याःगु तालिम वइगु फागुन ५ गतेतक न्ह्याइगु जानकारी ग्वसाः खलकं बिउगु दु ।

तालिम येँय् नं झायादीम्ह जगानन्द शर्मा राजोपाध्यायं बिया वयाच्वनादीगु खः । तालिम उलेज्याझ्वलय् ताःई न्ह्यवंनिसें नेवाः भाय्, कला, संस्कृतिया उत्थाननापं मानवीय सेवा, समाजसेवाय् योगदान बिया वयाच्वनादीम्ह भाजु युद्धप्रसाद श्रेष्ठ व मय्जु सरला कायस्थयात दबूपाखें दोसल्लां न्ययेकाः हनेज्या याःगु खः ।

ज्याझ्वलय् पाहांकथं नेवाः देय् दबूया न्वकु कृष्ण उदास, सल्लाहकार सरला कायस्थ, केन्द्रीय दुजः अनिल मास्के, जयकुमार श्रेष्ठ नापं प्रदेश नं. १ या प्रदेशसभा सदस्यपिं, इटहरी उपमहानगरपालिकाया प्रमुख, वरिष्ठ प्रहरी उपरीक्षक लगायत थीथी जिल्लाया प्रतिनिधिपिनिगु उपस्थिति दुगु खः ।