ब्वँमिपिनिगु निंतिं नेवाः तजिलजि ब्वज्या

येँ – नेवाः स्यनामि दबू, नेपालमण्डलया ग्वसालय् वंगु वालय् ‘नेवाः तजिलजि ब्वज्या’ जुल । थनया नेपाल आदर्श माध्यमिक विद्यालयय् थीथी ब्वनेकुथिया ब्वँमिपिंत लक्षित यानाः उगु ब्वज्या जूगु खः ।

दबूया पुलांम्ह नायः कृष्णभक्त मानन्धरया सभापतित्वय् मूपाहां बाङ्मय शताब्दीपुरुष सत्यमोहन जोशीं उलेज्या यानादीगु ब्वज्याय् नीखुगू ब्वनेकुथिया ब्वँमिपिंत नेवाः जातिया जनजीवन नापं स्वापू दुगु नेवाः तजिलजि, तिसा वसः, बसजाः ज्वलंनापं नसात्वँसा ज्वलंया बारे थीथी ब्वनेकुथिया स्यनामिपिंसं जानकारी बियादीगु खः ।

दबूया छ्याञ्जे बरुण वैद्यं लसकुस यासें नेवाः तजिलजिया बारे थीथी ब्वनेकुथिया ब्वँमपिंत जानकारी बीगु उद्देश्यं उकथंया ज्याझ्वःया ग्वसाः ग्वयागु जानकारी बियादिल । लिसें वय्कलं वइगु शैक्षिक सत्रय् दछिया दुने च्यागू तगिंतकया निंतिं आवश्यक पाठ््यक्रम दयेकेगु भाला स्यनामि दबूयात बिउगु व उकिया निंतिं माःगु आर्थिक व्यवस्थापन येँ महानगरपालिकां याइगु नं जानकारी बियादिल ।

मूपाहां जोशीं नेवाःतय्सं कुतः याना वन धाःसा नोबेल सिरपाः तकं त्याके फइगु दावी यानादिल । नेवाः देय् दबूया नायः नरेश ताम्राकारं थुकथंया ज्याझ्वः अतिकं च्वछायेबहजू धासें थःत नेवाः धायेके यःपिं तर नेवाःया तजिलजिया बारे छुं नं मसिउपिं थीथी जिल्लाय् च्वंपिं नेवाःतय्त नं थुकथंया ज्याझ्वः यानाः थुइकेगु कुतः यायेमाः धयादिल ।

ज्याझ्वलय् पाहांकथं झायादीपिं संस्कृतिविद् डा. चुन्दा वज्राचार्य व मदनसेन वज्राचार्यं नं नेवाः जनजीवननाप स्वापू दुगु थीथी पक्षयात कयाः कुलादीगु खः ।

सम्बन्धित बुखँ

LEAVE YOUR COMMENTS