डल्लु आवासय् मेयरया निरीक्षण
येँ– येँ महानगरपालिकाया मेयर विद्यासुन्दर शाक्यं वडा नं १५य् लाःगु डल्लु आवास लागाया निरिक्षण यानादीगु दु । वय्कःयात डल्लु आवास स्थानीय सहयोग समितिया नायः राजा शाक्यं लसकुस यानादीगु खः ।
मेयर शाक्यं डल्लु आवास क्षेत्रय् जुयाच्वंगु विकास निर्माण ज्या निरीक्षण यानादीगु खः । मेयर शाक्यं त्वःतेगु लः वितरणया निंतिं आवासय् दयेकूगु डीप बोरिङ्ग, मर्मत याये ल्यंदनिगु लँ, मर्मत जुयाच्वंगु लँ, सार्वजनिग जग्गा, पार्क, सामुदायिक स्वास्थ्य भवन व वडा भवनया निरीक्षण यानादीगु खः ।
निरीक्षण न्ह्यः जूगु छगू औपचारिक ज्याझ्वलय् न्ववानादीसें मेयर शाक्यं थःगु ज्या यायेगु शैली भचा बिस्कं कथंया दुगु, तर योजनाबद्ध कथं न्ह्याकाच्वनागु खँ धयादील । ‘छम्ह वडाध्यक्षया निगू भुमिका दइ, छगू वडाया अध्यक्षया भूमिका मेगु कार्यपालिकाय् दुजः, कार्यपालिका धयागु नगरपालिकाया निंतिं नेपाल सरकारया क्याबिनेट सरह जूगुलिं महानगरयात बांलाकेत ३२ गुलिं हे वडाया जनप्रतिनिधितय्सं थःगु दायित्व बांलाक पूवंकेमाः’ वय्कलं धयादीगु दु ।
वडाध्यक्ष व वडा सदस्यपिंसं वडावासीपिंत क्यनीगु बांलाःगु ब्यवहारं हे थःगु ज्याया मूल्यांकन याइगु जूगुलिं बांलाक ज्या मयात धाःसा मेयरयात नं बांमलाःगु लिच्वः लाइ धासें मेयर शाक्यं धयादिल, ‘थ्व दक्व टिमवर्क खः, सुनांनं जि याकःचां यानागु धकाः धायेमजिउ’
‘२९६ रोपनी क्षेत्रफलय् न्यनाच्वंगु अले च्यासलं मल्याक छेँखा दुगु डल्लु आवसायात सुविधासम्पन्न दयेकेगु कुतः यानाच्वनाःगु दु’ सहयोग समितिया नायः राजा शाक्यं आवास क्षेत्रय् जुयाच्वंगु ज्याया बारे जानकारी बिसें धयादिल, ‘खानेपानी, विजुली व सडक थेंज्यागु आधारभूत आवश्यकताया ज्या दु्रतरुपं अभियान कथं हे न्ह्यःने यंकाच्वनागु दु । मेयरपाखें डल्लु लागाया निंतिं फ्यानाबिउगु बजेटं यानाः ज्या बांलाक न्ह्याःवनेफुगु खः ।’ वय्कलं डल्लु आवास व छाउनी स्वाइगु गल्लीयात तःब्या यायेत व खुल्ला क्षेत्रयात पार्क दयेकेगु ज्याय् नं बजेट तयाबीत मेयरयात इनाप यानादीगु खः ।
निरीक्षण ज्याझ्वलय् क्षेत्र नं ८ या प्रतिनिधि सभा दुजः जीवनराम श्रेष्ठ, १५ वडाया वडाध्यक्ष ईश्वरमान डंगोल, वडासदस्यपिं, महानगरपालिकाया विभागीय प्रमुख व स्थानीयपिनिगु उपस्थिति दुगु खः । ज्याझ्वः डल्लु आवास स्थानीय सहयोग समितिया ग्वसालय् जूगु खः ।
LEAVE YOUR COMMENTS