गणतन्त्रया नामय् देशय् अधिनायकवाद हावी ः श्रेष्ठ

येँ – समाजवादी पार्टी नेपालया सहअध्यक्ष राजेन्द्र श्रेष्ठं संघीय गणतन्त्रया नामय् देशय् अधिनायकवाद हावी जुयाच्वंगु द्वपं बियादीगु दु । वय्कलं जुजुसहितया राजकीय समाजवाद हयेत स्वयाच्वंगु व उकथं हे केन्द्रीतकृत शासन प्रणाली लागू यायेत व्यवस्थापिका, कार्यपालिका व न्यायपालिकायात नियन्त्रण यायेत स्वयाच्वंगु नं धयादीगु दु ।

प्रतिनिधिसभाया सदस्य तकं जुयाच्वनादीम्ह सहअध्यक्ष श्रेष्ठं उगु खँ वंगु विहीवाः थनया नेपाः ब्यांक्वेटय् पत्रकारत नाप लायेगु झ्वलय् धयादीगु खः । वय्कलं देशय् सुशासन कायम यायेगु खःसा राजनीतिक दलया नेतातय् जनतां अंकुश तयेगु स्वयेमाः धयादिल । जनताया अंकुशय् मच्वनीपिं नेतात निरंकुश जुइगु जिकिर वय्कलं यानादिल ।

सरकारया नेतृत्व यानाच्वंगु नेकपां देय्या हरेक ख्यलय् अंकुश तयेत स्वयाच्वंगु धासें थुकिं यानाः प्यखेरं वर्तमान सरकारया रवैयाप्रति असन्तुष्टि ब्वलना वनाच्वंगु वय्कःया दावी दु । प्रेस काउन्सिल, स्वास्थ्य विधेयक लगायत थीथी विधेयक हयाः नेकपां हरेक ख्यलय् नियन्त्रण यायेत स्वयाच्वंगु वय्कःया द्वपं दु ।

लिसें वय्कलं व्यवस्थापिका, कार्यपालिका व न्यायपालिकायात थः कार्यकर्ता भर्ना यायेगु केन्द्र दयेकाच्वंगु नं दावी यानादिल । समुन्नत संघीय समाजवाद बारे थःगु धारणा स्पष्ट यायेगु झ्वलय् वय्कलं बेलायत व चीनय् एकात्मक राज्य कायम जुयाच्वंगु तर थःपिंसं अमेरिका थेंज्याःगु संघीय स्वरुपया समाजवादीया क्रान्तिया निंतिं सत्ताय् वनागु धयादिल ।

प्रधानमन्त्री व मुख्यमन्त्रीया खँ हे मिले मजुइक शक्ति बाँडफाँडया लिधंसाय् सिद्धान्त अःखः नेपालय् शासन प्रणाली न्ह्यानाच्वंगु वय्कःया टिप्पणी दु । ज्याझ्वलय् पत्रकारतय्सं न्यंगु थीथी न्ह्यसःया लिसः नं वय्कलं बियादीगु खः ।