जोकोभिचयात युएस ओपन

थुगुसीया युएस ओपन टेनिस उपाधी नोभाक जोकोभिचं त्याकूगु दु । सर्वियाया जोकोभिचं स्वंगूगु वरियताया अर्जेन्टिनी कासामि जुआँ मार्टिन डेल पोट्रोयात बुकाः उपाधी ल्हातय् लाकूगु खः । खुगूगु वरियताया जोकोभिचं पोट्रोयात ६—३, ७—६ (७—४) व ६—३या सेटं बुकूगु खः । जोकोभिच जापानया केइ निशिकोरीयात बुकाः फाइनलय् थ्यंम्ह खः ।

च्याक्वतक युएस ओपनया फाइनलय् थ्यनेधुंकूम्ह जोकोभिचया थ्व स्वंगूगु युएस ओपन उपाधी खः। जोकोभिचं सन् २०११ व २०१५ नं युएस ओपन त्याकूगु खः । थुकिया लिसें जोकोभिचं अमेरिकाया महान कासामि पिट साम्प्रासया १४ गू ग्रान्डस्लामया बराबरी याःगु दुसा आः राफेल नाडाल स्वयां स्वंगू व रोजर फेडरर स्वयां खुगू ग्रान्डस्लामं जक लिउने दु ।

नाडालं १७ गू व फेडररं २० गू ग्रान्डस्लाम त्याका तयेधुंकूगु दु । ३१ दँया जोकोभिचं वंगु जुलाइलय् विम्बल्डन त्याकूगु खः । थुगुसी झ्वःलाक्क निगू ग्रान्डस्लाम त्याकाः जोकोभिच प्यंगूगु वरियताय् थहां वःगु दु ।

सम्बन्धित बुखँ

LEAVE YOUR COMMENTS