स्पेनय् हाकनं फुटबल, सेभिया त्यात
म्याड्रिड (एजेन्सी) – स्पेनय् स्वला लिपा हाकनं फुटबल न्ह्या:गु दु र बिहीवा: बहनिया न्हापांगु ला लिगा कासाय् सेभियां थ: स्थानीय प्रतिद्वन्द्वी रियल बेटिसयात २-० बुकल । जर्मनी धुंका: स्पेन फुटबल सुरु जूगु थ्व कासाया न्यागु प्रमुख युरोपेली देय्मध्ये निगूगु जूगु दु । कोरोनो भाइरस संक्रमणया महामारीया कारणं स्पेनय् फुटबल जुइमफयाच्वंगु ख: । दकलय् न्हापा जर्मनय् फुटबल हाकनं न्ह्या:गु ख: । मार्च १० लिपा स्पेनय् फुटबल जुइमफया च्वंगु ख: । आ: छवा: दुने इंग्ल्यान्ड व इटाली नं फुटबल हाकनं न्ह्याइ । ला लिगायात धा:सा ३९ दुने लिगया ल्यं दूगु सकतां कासा क्वचायेकेगु दबाब दु । सेभियाया जितय् लुकास ओकाम्पोसं ५६ मिनेटय् पेनाल्टीं न्हापांगु गोल यायेवं फर्नान्डो रेगेसं निगूगु गोल या:गु ख: । सेभिया ५० ल्याखय् लिगया स्वंगुगु थासय् दु ।
LEAVE YOUR COMMENTS