सम्बन्धन प्राप्त क्याम्पस केन्द्रया मातहतय् मतयेत सुझाव

येँ – उच्च शिक्षा क्षेत्रयात संघीयता अनुकूल दयेकेत त्रिभुवन विश्वविद्यालय थेंज्याःगु केन्द्रीय विश्वविद्यालय मातहतय् सम्बन्धन प्राप्त क्याम्पस मतयेत सिफारिस याःगु दु । विश्वविद्यालयया वर्गीकरण व मापदण्डया निंतिं डा. त्रिरत्न मानन्धरया संयोजकत्वय् गठन याःगु न्हय्म्हेसिया सुझाव समितिं बिउगु प्रतिवेदनं केन्द्रीय विश्वविद्यालयं आंगिक क्याम्पस जक व प्रदेश विश्वविद्यालयपाखें आंगिक व प्रदेश निगुलिं क्याम्पस संचालन याकेत सिफारिस याःगु खः ।

विश्वविद्यालय अनुदान आयोगं गठन याःगु उगु समितिं वंगु महिनाय् लःल्हाःगु प्रतिवेदनं प्रदेश विश्वविद्यालयया रुपय् वर्गीकृत वा न्हूगु चालीगु प्रदेश विश्वविद्यालयं जक सम्बन्ध बी दइगु व्यवस्था याःगु दु । थौंकन्हय् त्रिविअन्तर्गत ६० गू आंगिक व १०८४ गू सम्बन्धन प्राप्त क्याम्पस दु ।

न्यादँया दुने त्रिविं सम्बन्ध प्राप्त क्याम्पसबारे व्यवस्थापन यायेमाःगु प्रतिवदनया सुझाव दु । सुझाव कार्यदलया संयोजक मानन्धरं थौंकन्हय् संचालन जुयाच्वंगुमध्ये त्रिविसहित न्यागू विश्वविद्यालययात केन्द्रीय व मेगु न्यागू विश्वविद्यालययात प्रदेश विश्वविद्यालयया रुपय् स्थापित यायेत सुझाव बियागु जानकारी बियादिल ।

त्रिवि देय्या हे दकलय् न्हापांगु व तःधंगु विश्वविद्यालय व मेगु प्यंगू विषयगत विश्वविद्यालययात केन्द्रीय विश्वविद्यालयया मान्यता बीत उपयुक्त जुइगु कार्यदलया राय दु । काठमाडौं विश्वविद्यालययात धाःसा केन्द्रीय व प्रदेश गुगु तहया मान्यता बीगु धइगु बारे समितिं छुं नं ठोस सुझाव बियातःगु मदु ।

अनुसूचि ५ या संघया अधिकार सूचीइ केन्द्रीय विश्वविद्यालय, केन्द्रीस्तरया प्रज्ञा प्रतिष्ठान, विश्वविद्यालय मापदण्ड व नियमन, केन्द्रीय पुस्तकालय व अनुसूची ६ लय् प्रदेशया अधिकार सूचीइ प्रदेश विश्वविद्यालय व पुस्तकालय तयातःगु दु ।

केन्द्रीय रुपं वर्गीकृत जुइत उपयुक्त जुइगु विषयगत विश्वविद्यालय नेपाल संस्कृत, कृषि तथा वन, बौद्ध, खुल्ला विश्वविद्यालय दुसा पूर्वाञ्चल, पोखरा, मध्यपश्चिम, सुदूरपश्चिम व राजर्षि विश्वविद्यालय प्रदेश विश्वविद्यालयया रुपय् घोषणा यायेत सुझाव बियातःगु दु ।

संयोजक मानन्धरं न्हूगु विश्वविद्यालयया हकय् संघीय संसदं कानुन दयेकाः चायेकूगु केन्द्रीप व प्रदेशसभां कानुन दयेकाः चायेकूगु विश्वविद्यालय प्रदेश विश्वविद्यालय जुइगु तर निश्चित मापदण्डया संख्यात्मक स्वयां विषयगत नापं लगानी व पूर्वाधारया आधारय् विश्वविद्यालय चायेकेगु ज्या जुृइमाः धयादिल ।

सम्बन्धित बुखँ

LEAVE YOUR COMMENTS