उजुरी मवयेवं सहमति कार्यान्वयन अन्योलय्

येँ – माध्यमिक तह तकया विद्यालय संचालनया जिम्मा स्थानीय तहय् वये धुंकूगु दु । देय् संघीयताय् वने धुंकाः शिक्षाय् जूगु न्हूगु व्यवस्था कथं येँ महानगरपालिकां शुल्क लित कायेगु सम्बन्धी सहमति कार्यान्वयन यायेगु ज्या हे अन्योलय् लानाच्वंगु दु । निजी विद्यालयं थःयथे वृद्धि याःगु शुल्क लित कायेगु निंतिं छुं नं उजुरी मवयेवं येँ मनपां नं उगु सहमति कार्यान्वयन मयाःगु खः ।

वंगु बैशाखय् थ्व सम्बन्धी सहमति जूगु खः । निजी विद्यालयष्ं अप्वः शुल्क काःगु सम्बन्धय् छुं नं निवेदन दुहां मवयेवं बैशाखय् जूगु सहमति नं कार्यान्वयनय् वये मफुगु खः । वंगु बैशाख २२ गते केन्द्र, स्थानीय तह व विद्यार्थी संगठन दथुइ जूगु मंकाः बैठकं निजी विद्यालयं विद्यार्थी भर्ना लगायत मेमेगु गतिविधिया निंतिं धकाः अप्वः शुल्क काःगु लित बीगु निर्णय याःगु खः ।

निर्णयकथं ज्या यायेत विद्यार्थी जक मखसे स्वयम अभिभावकं नं छुं उजुरी मयायेवं सहमित कार्यान्वयन याये मफयाच्वंगु खः । ‘विद्यार्थी व अभिभावक सुनानं उजुरी दर्ता याःगु मदु, उजुरी हे मवयेक गथे यानाः कारवाही यायेगु, थ्व मिले मजू’, येँ मनपा शिक्षा विभागया प्रमुख प्रल्हाद अर्यालं धयादिल, ‘सम्बन्ध दुगु निकायपाखें उजुरी वःसा अप्वः शुल्क काःगु विद्यालयपाखें शुल्क लित कायेगु निंतिं पहल यायेगु खः ।

येँ महानगरपालिका दुने तुलनात्मक रुपं सामुदायिक विद्यालय स्वयां निजी विद्यालय अप्वः संचालन जुयाच्वंगु दु । छगू तथ्यांककथं येँ महानगरपालिका दुने थौंकन्हय् १०० गू सामुदायिक विद्यालय दुसा करिब ७०० निजी विद्यालय संचालन जुयाच्वंगु दु ।

थ्व दक्वं विद्यालयय् करिब छगू लाख ख्वीन्याद्वः स्वयां अप्वः विद्यार्थी अध्ययन यानाच्वंगु दु । थगुने बैशाखय् जूगु स्थानीय तहया निर्वाचन लिपा माध्यमकि तहतकया शिक्षाया अधिकार स्थानीय तहयात बिउगु खः ।