महानगरं छुं छुं सतकखण्ड एकतर्फी याइगु

येँ(नेपालभाषा टाइम्स)- येँ महानगर पालिकां थःगु अधिकार क्षेत्रय् लाःगु छुं छुं सतकखण्ड एकतफीं (वान वे) रुपय् संचालन याइगु जूगु दु । येँमहानगरं निखेरं सवारी संचालनं समस्या जूगु धासें थःगु अधिकार क्षेत्रय् लाःगु छुं छुं सतकयात आः एकतर्फी (वान वे) यायेत्यंगु खः ।

येँ महानगरपालिकां थौंकन्हय् टु वेया रुपय् सवारी संचालन जुयाच्वंगु थनया दरवार मार्ग कमलादि, जमः, सिफः, डिल्लीबजाः, चारखाल क्षेत्रय् एकतर्फी सवारी संचालनया तयारी यायेत्यंगु खः । येँ महानगरया ट्राफिक व्यवस्थापन सल्लाहकार जगतमान श्रेष्ठं थुपिं सतकखण्डय् गबलय्निसें एकतर्फी संचालन यायेगु, छुं छगू निश्चित इलय् जक एकतर्फी संचालन यायेगु वा न्ह्याबलेंया निंतिं संचालन यायेगु धइगु बारे सहलह व अध्ययन जुयाच्वंगु जानकारी बियादीगु दु ।

महानगरं थःगु अधिकार क्षेत्रय् लाःगु थुपिं सतकय् निखेरं सवारी संचालनया कारणं ट्राफिक व्यवस्थापनय् समस्या वःगु धासें एकतर्फी संचालन यायेगु तयारी याःगु खः । थुपिं सतकखण्डय् असहज रुपं ट्राफिक जाम जुइगु व निखेरं सवारी संचालनं वये वने याइपिंत तसकं समस्या जूगुलिं आः एकतर्फी सवारी संचालनया निंतिं अध्ययनया ज्या न्ह्यानाच्वंगु वय्कलं कनादीगु दु ।

थुकथं हे येँमहानगरं थःगु अधिकार क्षेत्रय् लाःगु सतकय् ‘जेब्राक्रसिङ’य् रङ तयेगु ज्या नं न्ह्याकेत्यंगु दु । थौंकन्हय् आपालं थासय् जेब्राक्रसिङ सी मदयाः समस्या जुयाच्वंगु दु । थज्याःगु अवस्थाय् दुर्घटनाया जोखिम दुगुलिं सतकया मर्मत सम्भारलिसें थप व्यवस्थित यायेत महानगरं थःगु अधिकार क्षेत्रय् लाःगु सतकय् जेब्राक्रसिङय् रङ तयेत्यनागु ट्राफिक व्यवस्थापन सल्लाहकार श्रेष्ठं कनादिल ।

नियमकथं ८ मिटर तकया ब्या दुगु सतक महानगरया क्षेत्राधिकार दुने लाः । थ्व स्वयां तब्यागु सतकया अधिकार सडक विभागया खः । येँ महानगर दुने ८ मिटर स्वयां चिब्यागु सतकजक ९५० किलोमिटरं मल्याक दु । वइगु आर्थिक दँ ०८०÷८१या निंतिं सार्वजनिक पूर्वाधार निर्माण व सुधारपाखे चालु आर्थिक दँया क्रमागत योजनालिसें ७ गू अर्ब ३४ गू करोड ६४ गू लाख न्हय्छद्वः तका बजेट विनियोजन याःगु दु । थ्व अन्तर्गत सतक निर्माणयात थप व्यवस्थित यायेत २५ गू करोड बजेट विनियोजन याःगु दु ।