
नेपालय् हे न्हापांखुसी विदेशी पत्रपत्रिकात आयात यानाः नेपाली जनतायात ब्वंके गु ज्याया आरम्भ यानादीम्ह भाजु केशर बहादुर मास्के म्हिगः मंत । पाय्छि सछिदँया वैंशय् वय्कः मदुगु खः । वि.सं. २००६ सालय् ‘सन्देश गृह’ नांगु संस्था स्वनाः वय्कलं खास यानाः भारतीय पत्रपत्रिकात नेपालय् हयाः नेपाली जनतायात ब्वंके गु ज्या सुरु यानादीगु खः ।
नेपाली जनतायात सचेत याकेगु लागिं विदे शी पत्रपत्रिका नं ब्वंके माः धइगु ताः तयाः वय्कः लगायत खस नेपाली भाषाया महाकवि लक्ष्मीप्रसाद देवकोटा, साहित्यकार हृदयचन्द्रसिंह प्रधान समेत जानाः सन्देश गृह स्वनेगु ज्या जूगु खः ।
थौंकन्हय् धाःसा सन्देश गृह बन्द जुइधुंकूगु दु । अथे हे वि.सं. २००७ सालय् सिंहदरवारय् कार्यरत न्यून अवैतनिक कर्मचारीतय्सं याःगु आन्दोलनया नेतृत्व नं भाजु मास्कें हे यानादीगु खः । उगु आन्दोलनया कारणं सिंहदरवार हे छवाः तक ठप्प जूगु खःसा थ्वहे द्वपनय् वय्कःयात निष्काशन याना हःगु खः ।
आपालं सामाजिक ज्याय् नं सक्रिय जुयादीम्ह मदुम्ह मास्केया अन्त्येष्टि म्हिगः पशुपति आर्यघाटय् जुल । वय्कःया काय स्वम्ह व म्ह्याय् निम्ह दी । वय्कः नेपालभाषाया बाखं च्वमि मञ्जु मास्के (मल्ल) या बौ लिसें नेवाः न्ह्यलुवा मल्ल के. सुन्दर या ससःबौ नं खः ।
LEAVE YOUR COMMENTS