यलया आपालं ल्वहंहितिइ लः हाल
यल(नेपालभाषा टाइम्स)÷यलया अधिकांश ल्वहंहितिइ हाकनं लः हाःगु दु । करिब स्वंगू दशकलिपा थनया अधिकांश ल्वहंहितिइ लः हाःगु खः । नेपाःया मौलिक सभ्यताया रुपय् दयाच्वंगु ल्वहंहितिइ लः महाःगु जुगौं दयेधुंकूगु दु ।
गुलिखे ल्वहंहिति अस्तित्वय् तकं मदया वनेधुंकूगु व दुगु ल्वहंहिति नं प्रतिकात्मक रुपय् जक दयाच्वंगु अवस्थाय् थनया ल्वहंहितिइ हाकनं लः हाःगु दु । करिब स्वंगू दशकलिपा यलया ९७ प्रतिशत स्वयां अप्वः ल्वहंहितिइ लः हायेवं स्थानीयवासी दथुइ छगू कथंया लसताया भाव खने दया वःगु खः ।
स्वनिगलय् अप्वया वनाच्वंगु जनसंख्या, उकिया नापनापं अनियन्त्रित बसोबास, डिप बोरिङ, अव्यवस्थित भौतिक संरचना निर्माण आदि थीथी कारणं स्वनिगःया मौलिक सभ्यताया रुपय् दयाच्वंगु ल्वहंहितिं लः महाःगु जक मखु अज्याःगु हितिया अस्तित्व तकं न्हनावनाच्वंगु दु ।
ल्वहंहितियात सभ्यता व सम्पदाया रुपय् कायेगु याःसां महत्व मथूगुलिं, संरक्षण व संवद्र्धन सशक्त रुपं जुइ मफुगुलिं नं थुकिया अस्तित्व न्हनावंगु खः । थीथी कारणं ल्वहंहितिइ लः सुना वंगु व लोप जुइगु अवस्थाय् थ्यनेधुंकूगु थनया ल्वहंहितिइ विचाः मयाःकथं हाकनं लः हायेवं स्थानीयतय् दथुइ छगू लसताया भाव खने दयाच्वंगु दु । थःगु जीवनय् ल्वहंहितिं लः हाःगु स्वये खनी मखुत धइगु मनस्थिति दयेकाच्वंपिनिगु निंतिं लसताया खँ जुयाबिउगु दु ।
यलय् थीथी थासय् करिब न्यागू दर्जनं मल्याक ल्वहंहिति दु । उकीमध्ये निगू, स्वंगू थासय् च्वंगु ल्वहंहितिइ जक लः महाः । स्थानीय पूर्णबहादुर तण्डुकार ल्वहंहितिं हाकनं लः हाःगु खनाः तसकं लय्तायादी । मेलम्चीया लः वयेवं डिप बोरिङ यानाः भूमिगत लः सालेगु म्हो जूगुलिं ल्वहंहितिइ लः हाःगु खयेमाः धइगु वय्कःया धापू दु । खतुं वंगु असारनिसें भदौ तकया निंतिं धकाः मेलम्चीया लः नं बन्द यानातःगु दु । यदि भदौलिपा नं मेलम्चीया लः वितरण मजुल धाःसा आः लः हायाच्वंगु ल्वहंहितिं हाकनं लः सुना वनीगु स्थानीयतय्सं धाःगु दु ।
आपालं ल्वहंहितिं लः हाया वःगु इलय् थनया अतिकं नांजाःगु लुँहिति व सिन्चाहितिइ धाःसा लः वयाच्वंगु मदु । थुपिं निगुलिं हितिइ पाटन औद्योगिक क्षेत्रय् डिप बोरिङ यानाः न्हिं लखौं लिटर लः सालीगुलिं लः मवःगु खयेमाः धइगु स्थानीयवासीया धापू दु ।
LEAVE YOUR COMMENTS