किपुली थौं सहीद दिवस

किपू – वि.सं. २०४६ सालया जनआन्दोलनय् प्रहरीया गोली लानाः सहीद जूपिनि लुमन्तिइ मंगलवाः सुथय् किपुली नसंचा उलेज्या जुइगु जूगु दु । सहीद स्मृति व्यवस्थापन समितिया ग्वसालय् किपूया खासि बजाःया प्रहरी चौकी न्ह्यःनं ज्याझ्वः न्ह्याइगु खँ समितिया नायः सिद्धिकुमार महर्जनं धयादीगु दु । मंगलवाः हे न्हिनय् साढे २ बजे इन्द्रेणी साँस्कृतिक समाजया ग्वसालय् नयाबजाःया कृष्ण क्याटरिङय् साँस्कृतिक श्रद्धाञ्जली ज्याझ्वः नं जुइगु जूगु दु ।जनआन्दोलनया झ्वलय् चैत २० गते किपुली खासी बजाःया चौकी न्ह्यःने प्रहरीया गोलीं लानाः प्यम्ह सहीद ज ूगु खः । उबलय् सहीद जूपिं राजेन्द्र महर्जन, राजमान माली, हिराकाजी महर्जन व लनबहादुर महर्जनया लुमन्तिइ समितिं दँय्दसं थीथी ज्याझ्वः यासें सहीद दिवस न्यायेका वयाच्वंगु दु । सहीद दिवसया झ्वलय् समितिपाखें वंगु चैत ९ गते कार्यशाला गोष्ठी, चैत १७ गते नासः पुचःया ग्वसालय् हिदान जूगु खँ नं अध्यक्ष मानन्धरं जानकारी बियादीगु दु । अथेहे समितिया अन्तर्गतया युवा खेलकूद समुहया ग्वसालय् म्हिगः निसें खुल्ला ब्याडमिन्टन नं न्ह्याःगु दु ।