ने. सं. ११४३ चौलाथ्व सप्तमी -

नक्सा पास मजूगु छेँयात नक्सा पासया मौका

येँ – येँ महानगरपालिकां नियम कथं दयेकूगु तर नक्सा पास मजूगु छेँया निंतिं विशेष व्यवस्था हःगु दु । दयेकेधुंकूगु तर नक्सा पास यायेगु प्रक्रियाय् तकं मवंनिगु निजी, सार्वजनिक व सरकारी छेँयात नक्सा कथं दयेकेगु निंतिं थज्याःगु व्यवस्था हःगु खँ येँ मनपां धाःगु दु ।
येँ मनपाया इन्जिनीयर राम थापाया कथं येँ मनपाय् अप्वः धइथें छेँ नक्सा पास मजूगु लूगुलिं मनपां थज्याःगु व्यवस्था याःगु खः ।

थापां धयादी, ‘नगरवासीया निंतिं थ्व छगू मौका खः, थुगु मौकाया नं सदुपयोग मयाःसा आपालं नगरवासीया छेँ नक्साविहीन जुइगु व उगु छेँपाखें कायेमाःगु फाइदां बञ्चित जुइ माली ।’ वइगु लछिया दुने नियम कथं छेँ निर्माण जूगु व नक्सा पास मयासे दयेकूगु छेँया थुवाःतय्सं छेँया विवरण सहित येँमनपाय् निवेदन पेश यायेमाः ।

नगरवासीया सेवायात ध्यानय् तयाः येँ मनपां छुं न्हिं न्ह्यः विवरण सहित निवेदन पेश यायेत स्वीन्यान्हुया सूचना जारी यायेधुंकूगु दु ।
पेश याःगु सूचनाया आधारय् येँ मनपाया प्रतिनिधित सम्बन्धित छेँथुवाःया छेँय् वनाः नक्सा पास यायेगु प्रक्रियाय् यंकीगु खँ धाःगु दु । स्थानीय सरकार सञ्चालन ऐनय् नक्सा स्वीकृत मयासे दयेकेगु नियम कथं व स्वीकृत नक्सा स्वयां बिस्कं कथं दयेकूगु छेँया निंतिं छक्वःया निंतिं विशेष व्यवस्था यायेमाःगु प्रावधान दु ।

थ्वहे झ्वलय् येँमनपाय् लिपांगु इलय् नक्सा पास यायेत वइपिं म्हो जूगु दु । वंगु दँय् न्हिं २० गू तक नक्सा पास यायेत वइगु खःसा थौंकन्हय् १० गू जक वयेगु यानाच्वंगु दु । येँ मनपां नक्सा पास यायेगु निंतिं छुं विशेष प्रावधान हःगु व येँ मनपा दुने जग्गाया अभाव जुयाः छेँ दनेगु थाय् तक हे मदयेधुंकूगु कारण. यानाः नं नक्सा पास याः वइपिं म्हो जूगु खँ मनपां धाःगु दु ।

निर्माण सम्पन्न प्रमाणपत्र मदयेकं छुं नं बैंक सम्बन्धी ज्या याये मफइगु जूगुलिं लिपांगु इलय् निर्माण सम्पन्न प्रमाणपत्र काइपिनिगु ल्याः धाःस ान्हिथं अप्वया वनाच्वंगु दु । आः मनपां निर्माण सम्पन्नया खँय् वयाच्वंगु समस्या नं समाधान यायेगु लागिं छुं विशेष निर्णय यायेत्यंगु खँ धाःगु दु ।