भूटानविरुद्ध नेपाः ४ गोलं त्यात

भूटानविरुद्ध नेपाः ४ गोलं त्यात

तेजनारायण महर्जन

येँ – झिंस्वक्वःगु दक्षिण एशियाली कासा (साग) फुटबलय् नेपालं विजयी सुरुवात याःगु दु । मंगलवाः क्वचाःगु कासाय् नेपालं भूटानयात ४–० गोलं बुकूगु खः । नेपाःया निंतिं कप्तान सुजल श्रेष्ठं निगू गोल यातसा अभिषेक रिजाल व मिक्चेन तामाङ छगू छगू गोल यात ।

भूटानविरुद्धया कासाय् दकलय् न्हापां नेपाःया निंतिं साग कासाय् डेब्यु याःम्ह मिक्चेन तामाङं कासाया ७७ औं मिनेटय् याःगु गोल दकलय् स्वयेबहःगु जुल । तामाङं पोष्ट जवपाखें थ्वाःगु फ्रिकिक बल स्विङ्ग जुयाः प्यंक विपक्षीया पोस्टय् दुहां वंगु खः ।

कासाय् कप्तान श्रेष्ठं खुगूगु मिनेटय् हे न्हापांगु गोलयासें नेपाःया अग्रता बिउगु खः । न्हापांगु हाफय् थ्व लिपा मेगु गोल जुइमफुतसा निगूगु हाफय् नं श्रेष्ठं कासा सुरु जूगु खुगूगु मिनेटय् हे मेगु छगू गोल यासें अग्रता निदुगं यानाबिउगु खः । थ्व लिपा ६६ औं मिनेटय् रिजालं छगू गोल यातसा ७७ औं मिनेटय् मिक्चेनं मेगु गोल याःगु खः ।

कासा लिपा जूगु पत्रकार सम्मेलनय् न्ववासें नेपाःया प्रशिक्षक बालगोपाल श्रेष्ठं प्यलाया मेहनतया लिच्वः बांलाःगु पिहां वःगु खँ धयादिल । प्यला तकया प्रशिक्षण लिपा कासामितय्सं थःगु निर्देशन कथं म्हितूगुलिं सहज विजय चूलाकेफुगु खँ वय्कलं धयादिल ।

‘जिमिगु रणनीतिं न्हापांगु झिगू मिनेट दुने हे गोल यायेगु धयागु खः, गुगु सफल जुल । थ्व गोल लिपा भूटानं दबाब तल, तर निगूगु हाफय् उपिं त्यान्नुगुया लबः जिमिसं कया’ प्रशिक्षक महर्जनं धयादीगु दु । निगू गोल याःम्ह सुजल श्रेष्ठं न्यादँ लिपा रंगशालाय् म्हिताः गोल यायेदुगुलिं तसकं लय्ताःगु खँ धयादिल । ‘त्याःसां लसता न्यायेकेगु ई मदु, कन्हय् हे मेगु कासा म्हितेमानी । अले थथे हे विजय चूलाके मानि’ वय्कलं धयादिल ।

भारत व पाकिस्तानं ब्वति मकाःगु थुगुसीया सागया फुटबल राउन्ड रोविन आधारय् म्हितकूगु दुसा छगू कासा म्हिताः कन्हय् कुन्हु हे मेगु कासा म्हितेमाःगु जुयाच्वंगु दु । थुकिं यानाः कासामित त्यान्नुया म्हिते मफइगु धासें प्रशिक्षकतय्सं विरोध याःगु खः । अथेहे खःसां सहभागी दक्वं टिमं म्हिताच्वंगु दु । भूटानं सोमवाः जक बंगलादेश लिसे म्हितूगु खः । म्होतिं नं ४८ घन्टा आराम लिपा जक मेगु कासा म्हितेगु परम्परा दुगु खःसां भूटानं छन्हु लिपा हे नेपाःलिसे मेगु कासा म्हितेमाःगु खः । अथेहे नेपालं नं मंगलवाः जूगु कासा लिपा बुधवाः हे श्रीलंका लिसे धेंधेंबल्लाः यायेत्यंगु दु ।

भूटानया प्रशिक्षक पेमां थःपिनि कासामि त्यान्नुगुलिं बांलाक म्हिते मफुगु खँ धयादिसें धयादिल, ‘कासामित गोरु ला मखुनि उमित जोते यायेत । अय्सां म्हतेमाल । तर थौंया प्रदर्शनं जिमिगु कासामि खनाः लय् हे ताः । नेपाःया बांलाःगु टिम खः, उकिं त्यात ।’

सम्बन्धित बुखँ

LEAVE YOUR COMMENTS