ने. सं. ११४४ कौलाथ्व दुतिया -

अर्जेन्टिनाय् स्वन्हुया शोक दिवस

एजेन्सी – फुटबलया महान कासामि डिएगो म्याराडोना बुधवाः बहनी ६० दँया वैशय् हृदयघात जुया मन्त । नोवेम्भरया सुरु पाखे हे न्ह्यपुइ हि जमे जुयाच्वंगुलिं अप्रेशन यानाः छेँय् आराम यानाच्वंम्ह म्याराडोनायात बुधवाः बहनी हृदयघात जूगु खः ।

सन् १९८६ य् विश्वकप त्याकूबलय् अर्जेन्टिना टिमया कप्तान जुयाच्वंम्ह म्यारोडाना अर्जेन्टिना राष्ट्रिय टिमया प्रशिक्षक नं जुइधुंकूम्ह खः । म्याराडोना मदुगु दुःखय् अर्जेन्टिनी राष्ट्रपतिं देशय् स्वन्हुया राष्ट्रिय शोक घोषणा यानादीगु दु । राष्ट्रपति अर्बेर्टो फेर्नान्डेशं धयादीगु दु, ‘छं अर्जेन्टिनायात विश्वया उच्च तहय् थ्यंकाबिउगु दु, देय्यात तसकं खुसी बिल, जिमिसं छंत तसकं लुमंकाच्वना ।’

अर्जेन्टिनी जनता नं म्याराडोनाया निधनं शोकय् लाःगु दु । अर्जेन्टिनाया जनता नं म्याराडोनायात श्रद्धा प्वंकेत राजधानी बेनोस आइरिजया मू सतकय् व रंगशाला जःखः मुंवःगु दु । सन् १९८२ या विश्वकप फुटबल निसें चर्चाय् वःम्ह म्याराडोनां स्पेनिस महाराथी बार्सिलोना व इटलीया नापोली क्लबं नं म्हितूगु दु ।

अर्जेन्टिनापाखें प्यंगू विश्वकप म्हितूम्ह म्याराडोनां अर्जेन्टिनापाखें ९१ गू कासा म्हिता ३४ गोल याःगु दु। छगू इलय् कोकिनया लतय् लाःम्ह म्याराडोनायात सन् १९९१ य् लागु वासः छ्यःगु पुष्टि जुइवं १५ महिनाया प्रतिबन्ध नं तःगु खः । वय्कलं सन् १९९७ य् व्यावसायिक फुटबलपाखें अवकाश कयादीगु खः ।

म्याराडोना मदुगु दुःख विश्वन्यंकंया विशिष्ट व्यक्तित्वपिंसं श्रद्धाञ्जली प्वंकूगु दु। ब्राजिलया महान कासामि पेलें ट्विट यासें धाःगु दु, ‘गज्याःगु दुःखया खबर, जिं छम्ह महान पासा व विश्वं प्रख्यात कासामि तंके माःगु दु । धायेमाःगु यक्व दु, तर आःयात ईश्वरं वया छेँजःपिंत शक्ति बीमा, जितः आशा दु- छन्हु जिपिं सर्गतय् नापं बल म्हितेगु जुइ ।’

इटलीइ उत्कृष्ट फुटबल कासा म्हितूम्ह म्याराडोनाया सम्मानय् नेपोलीया प्रशंसकत सतकय् कुहां वयाः म्याराडोनायात श्रद्धा प्वंकूगु दु। अथेहे रोमय् पोप फ्रान्सिसं म्याराडोनायात देशवासी सरह स्नेहपूर्वक लुमंकी धयादीगु दु ।