१८ औं एशियाली कासा तेक्वान्डोय् निराश

येँ –  इन्डोनेशियाया जकार्ता जुयाच्वगु १८औं एशियाली कासा अन्तर्गत तेक्वान्दोय् कासाय् नेपाः मंगलवाः नं निराश हे जुइमाःगु दु । मंगलवाः तेक्वान्डोपाखें निम्ह मिसा व छम्ह मिजं कासामिं प्रतिस्प्रर्धा याःगु खः । म्हिगः जूगु ७७ केजी सिबें क्वय्या कासाय् फिलिपिन्सया लोपेज पाउलिन लोइसं क्वाटरफाइनलय् नेपाःया ज्ञानी मुनिकारयात २०—० या तःधंगु अन्तर बुकल ।

ज्ञानी भुटानया छोडेन किन्जाङयात २८–६ अंकं बुकाः क्वार्टरफाइनल थ्यंगु खः । मिसा ६७ केजी सिबें च्वय्या कासाय् नेपाःया निशा रावलयात चीनया गाउ पानं न्हापागु चरणं हे २२–६ अंकं बुकल । मिजं ८० केजी सिबें च्वय्या कासाय् नं नेपाःया अनोज पुजारी काजकिस्तानया झापारोभ रुसलानलेनपाखें २१–० या तःधंगु अन्तरं बुत ।

थौं बुधवार नेपाःया भूपेन्द्र श्रेष्ठं ८० केजी स्वयां क्वय् व वीरबहादुर महरां ६३ केजी सिबे क्वय्या तौल समूहय् प्रतिस्पर्धा याइगु खँ तेक्वान्दोया प्रशिक्षक दीपक विष्टं धयादीगु दु । एशियाली कासाय् दकलय् अप्वः पदक नेपाः तेक्वान्दों कयातःगु दु । एसियाली कासाय् नेपालं छगू रजत व १३ गू कास्य यानाः १४ गू पदक त्याकातःगु दु ।

मेखे पौडी पाखे नेपाःया शिरिष गुरुङ मिजंतय् ५० मिटर फ्रिस्टाइल पाखे ४६ औं स्थानय् लात । मुक्कं ५१ म्ह कासामिपिंसं ब्वति काःगु उगु स्पर्धाय् शिरिष २६.३३ सेकेन्डं दूरी पार याःगु खः । थ्व स्पर्धाय् राष्ट्रिय कीर्तिमान धाःसा शिरिष हे नामय् दु । वं २५.८८ सेकेन्डया राष्ट्रिय किर्तिमान तयातःगु खः ।

शिरिषं वइगु बिहिवाः १०० मिटर फ्रिस्टाइल प्रतिस्पर्धा याइ । अथेहे बुवाः गौरिका सिंहं २०० मिटर फ्रिस्टाइल व शुभम श्रेष्ठं १०० मिटर ब्रेस्टस्ट्रोकय् प्रतिस्पर्धा याइ ।

सम्बन्धित बुखँ

LEAVE YOUR COMMENTS