भारतया रेल हयेत मेगु वालय् सम्झौता

येँ – नेपालय् रेलमार्ग निर्माण यायेगु विषयं मूर्त रुप काइगु जूगु दु । उकिया निंतिं नेपाः व भारत दथुइ द्विपक्षीय सम्झौता जुइत्यंगु दु । नेपाः व भारत दथुइ रेलमार्ग निर्माणयात कयाः द्विपक्षीय सम्झौता (एमओयु) जुइत्यंगु खः ।

वीरगंजं येँय् तक वइगु रेलमार्ग निर्माणया निंतिं नेपाः व भारत दथुइ जुइत्यंगु सम्झौताया ड्राफ्ट नं तयार जुइधुंकूगु दु । परराष्ट्र मन्त्रालयं तयार याःगु एमओयुया ड्राफ्ट आः भौतिक पूर्वाधार तथा यातायात मन्त्रालयय् छ्वःगु दु ।

रेलमार्ग निर्माणया सम्बन्धय् निगुलिं देय्या प्रधानमन्त्रीस्तरय् सहमति जूसां सरकारी स्तरय् धाःसा औपचारिक रुपं आःतक छुंकथंया सम्झौता वा सहमति धाःसा जूगु मदुनि । परराष्ट्रं आः ड्राफ्ट याःगु एमओयु नं निगू देय्या प्रधानमन्त्री दथुइ जूगु सहमति कथं तयार याःगु खःसा आः उकियात हे कार्यान्वयन यायेगु तयारी जुयाच्वंगु खँ सीदुगु दु ।

थ्व हे वइगु भदौया निगूगु वालय् येँय् जूवनाच्वंगु बिमिस्टेकया प्यक्वःगु शिखर सम्मेलनया झ्वलय् लाकाः सम्झौता पतिइ औपचारिक रुपं ल्हाःचिं तयेगु तयारी नं जुयाच्वंगु दु । सम्झौतायात औपचारिकता बी स्वयां न्ह्यः उकियात मन्त्रिपरिषदय् यंकाः पारित यायेगु तयारी जुयाच्वंगु दु ।

मन्त्रिपरिषदंं पारित यायेधुंकाः मन्त्रालयं तयार याःगु ड्राफ्टय् नेपाःपाखें यातायात मन्त्रालयया सचिव मधुसुदन अधिकारी व भारतपाखें नेपाःया निंतिं भारतीय राजदूत मञ्जीभ सिंह पुरीं ल्हाःचिं तयाः औपचारिकता बीगु खँ सीदुगु दु ।