‘रुस–युक्रेन युद्धं नेपालय् तःधंगु लिच्वः लाइमखु’

येँ – रुसं युक्रेनय् आक्रमण याःगुलिं नेपाःया अर्थतन्त्रय् नं तःधंगु लिच्वः मलाइगु खँ धाःगु दु । रुसी आक्रमण लिपा अन्तर्राष्ट्रिय बजारय् थीथी कथंया लिच्वः खने दयावयेधुंकूगु दु । नेपालय् धाःसा थुकिं प्रत्यक्ष रुपं लिच्वः लाइगु खनेमदुसा, तर अप्रत्यक्ष रुपं छुं भचा लिच्वः लायेफु । अथे खःसां थुकिं तःधंगु समस्या धाःसा मवइगु खँ अर्थविद्तय् धापू दु ।

आःया अवस्थाय् विशेष रुपं चिकंया कारणं नेपाःयात नं अप्रत्यक्ष रुपं लिच्वः लाइगु खनेदुगु दु । विश्वय् आपूर्ति जुइगु चिकं मध्ये रुसय् जक १२ प्रतिशत उत्पादन जुइ । आः युक्रेनय् आक्रमण जुइधुंकाः रुसविरुद्ध अमेरिका लिसें युरोपेली देय्तय्सं रुसविरुद्ध थीथी प्रतिबन्ध नं तयेधुंकूगु दु । थ्व हे झ्वलय् अन्तर्राष्ट्रिय बजारय् निन्हुया दुने चिकंया भाः प्रतिब्यारेल १०० डलर स्वयां अप्वः थहां वनेधुंकूगु दु ।

अन्तर्राष्ट्रिय बजारय् चिकंया भाः थहां वनेवं नेपालय् नं पेट्रोलियम पदार्थया भाः थहां वनीगु जुइ । पेट्रोलियम पदार्थया भाः थहां वनेवं ढुवानी भाडा अप्वयाः न्हियान्हिथंयात माःगु ज्वलं लिसें फुक्क कथंया ज्वलंया भाः थहां वनीगु सम्भावना दइगु खँ अर्थविद्तय् धापू दु । रुसं चिकंया आपूर्ति म्हो जूसां मेमेगु देसं थःपिनि उत्पादन अप्वयेकाबिल धाःसा चिकनय् नं समस्या मवइगु पुलांम्ह अर्थसचिव रामेश्वर खनालं धयादीगु दु । युक्रेन लिसे नेपाःया आर्थिक कारोवारय् यक्व मदु । रुसपाखें धाःगु वंगु दँय् निगू अर्ब ४० करोडया सामान आयात जूगु दु, तर निर्यात धाःसा १५ करोड तका बराबरया जक जूगु दु । थ्व ल्याखं ब्यापारिक दृष्टिकोणं नेपाःयात तःधंगु लिच्वः लाइगु खनेमदु ।

तर थ्व युद्धं नेपाःयात वैदेशिक ग्वाहालि वइगुलि धाःसा लिच्वः लायेफुगु खँ नं वयाच्वंगु दु । गनं नं युद्ध जुइवं पश्चिमा देय्तय्सं थःपिनि स्रोत युद्धय् खर्च याइ । अविकसित देय्तय्त बीगु ध्यबा युद्धय् खर्च जुइवं लिपा ग्वाहालि वइगु सम्भावना नं म्हो जूवनीगु गुलिखे अर्थविद्तय् धापू दु । तर पुलांम्ह अर्थसचिव रामेश्वर खनालं धाःसा रुस युक्रेन ल्वापुं नेपालय् वइगु वैदेशिक ग्वाहालिइ नं तःधंगु लिच्वः मलाइगु खँ धयादीगु दु । न्हापा नं थज्याःगु समस्या जूसां अविकसित देय्तय्त बीगु ग्वाहालि म्हो मयाःगु लुमंकादिसें वय्कलं उत्तर एटलान्टिक सन्धि संगठन नेटों थःपिनि सुरक्षा खर्च अप्वयेकूसां नेपाः थेंज्याःगु देसं बांलाःगु आयोजनाया प्रस्ताव यात धाःसा ग्वाहालि वइगु खँ धयादीगु दु ।

रुस युक्रेन तनावं रेमिट्यान्सया मामिलाय् धाःसा नेपाःयात अःखबतं लबः हे दइगु अर्थविद् खनालया धापू दु । रुसं चिकंया आपूर्ति म्हो जुइगु अवस्थाय् खाडी देय्तय्सं चिकंया उत्पादन अप्वयेकीगु जूगुलिं नेपाली ज्यामितय् पारिश्रमिक म्हो जुइगु सम्भावना मदु । नेपालय् दुहां वइगु रेमिट्यान्स अप्वः धयाथें खाडी देसं हे दुहां वइगु जूगुलिं थ्व युद्धं रेमिट्यान्सय् नं छुं नं लिच्वः मलाकीगु वय्कःया धापू दु ।

चकंया आपूर्ति म्हो जुइगु अवस्था वःसां बजाः भाः थमकायेगु निंतिं नेपालं मौद्रीक नीति व वित्तीय नीतियात बांलाकेमाःगु बिचाः वय्कलं तयादीगु दु । वय्कःया कथं थज्याःगु अवस्था वल धाःसा पेट्रोलियम पदार्थय् तयातःगु कर म्हो यानाबिल धाःसा उकिया प्रभाव नं म्हो जुइ । ‘अथे जुल धाःसा बजाः भाः थहां वनीगु सम्भावना दइमखु’ वय्कलं धयादीगु दु ।

सम्बन्धित बुखँ

LEAVE YOUR COMMENTS