म्वाय्लि बाजंया गुरुयात हना

ख्वप – ताम्राकार संगीत तालिम केन्द्रया रजत महोत्सव व मुक्ति संगीत प्रशिक्षण केन्द्रया झिंन्याक्वःगु दँमुँज्या जुल । तालिम केन्द्रया अध्यक्ष बद्रीनारायण ताम्राकारया सभापतित्वय् जूगु ज्याझ्वलय् प्रदेश नं. ३या सांसद सिर्जना सैंजू मूपाहांकथं झायादीगु खः । ज्याझ्वःया मूपाहां सैंजूं ख्वपया पुलांम्ह म्वाय्लि बाजं गुरु कान्छा गुणकाजी कपालीयात हनापौ लःल्हासें हनेज्या यानादीगु खः ।

ज्याझ्वलय् ख्वप नगरपालिकापाखें कपालीयात ग्वाहालिकथं देछाःगु झिंन्याद्वः तका दांया चेक ख्वप नगरपालिका वडा नं. ५ या वडाअध्यक्ष प्रेमगोपाल कर्माचार्यं लःल्हानादीगु खः । अथे हे अभिनन्दित व्यक्तित्व कपालीयात सांस्कृतिक संस्थानया महाप्रबन्धक राजेश थापा, सिद्धि स्मृति प्रतिष्ठान ख्वपया अध्यक्ष श्यामसुन्दर धौभडेल लगायत थीथी संघसंस्थजा व व्यक्तिगत रुपं नं वय्कःयात आर्थिक ग्वाहालि लःल्हाःगु खः ।

उगु हे ज्याझ्वलय् स्वलायंकं जूगु निःशुल्क सांगीतिक प्रशिक्षणय् सहभागि प्रशिक्षार्थी व प्रशिक्षकपिंत संस्थानया महाप्रबन्धक थापा व प्रतिष्ठानया अध्यक्ष धौभडेलं दसिपौ लःल्हानादीगु खः ।

मूपाहां सैंजू, ५ वडाअध्यक्ष कर्माचार्य, प्रतिष्ठानया अध्यक्ष धौभडेल लगायतं थःथःगु नुगःखँ प्वंकादीगु ज्याझ्वलय् भारतीय टेलिभिजन च्यानलं प्रशारण जुइगु रियालिटी शो ‘सारेगम’य् छनोट जुइत सफल अदिश्री कछपाल व आयुष केसी नापं सानुमैयां ताम्राकारं म्येँ न्यंकादीगु खः ।