नेकपाया केन्द्रीय समिति पुनर्गठन यायेमालीगु

झलनाथ तम्वःसां वय्कःया वरियता परिवर्तन मजुइगु

येँ -एमाले व माओवादी केन्द्र एकीकरण जुयाः गठन जूगु नेपाल कम्युनिष्ट पार्टीया केन्द्रीय ४०० स्वयां अप्वः दुजः दुगु केन्द्रीय समिति आः हानं पुनर्गठन याये मालीगु जूगु दु । समावेशी सिद्धान्त कथं पार्टीया केन्द्रीय समिति गठन यायेमाःगु कानुनी प्रावधान दुगु खःसां केन्द्रीय समिति अथे मजूगु कारणं आः केन्द्रीय समिति पुनर्गठन मयासें मगाःगु अवस्था दुगु खँ सूत्रं धाःगु दु ।

उकिया लागिं आः पार्टीया वरिष्ठ नेता वामदेव गौतम थम्हं हे प्रस्ताव यंकेगु तयारी यानाच्वनागु खँ कनादीगु दु । केन्द्रीय समितिइ ३३ प्रतिशत मिसा मदुगु लिसें कानुनी प्रावधान कथं ३७ प्रतिशत आदिवासी जनजाति नं मदुगु कारणं उकियात पुनर्गठन यानाः हे पूरा यायेमाःगु अवस्था दु ।

तर आः हे पार्टीया दुजःतय् ल्याः ४०० स्वयां अप्वः थ्यनेधुंकूगु कारणं समावेशी सिद्धान्त कथंं जातीय व लैंगिक समावेशीकरण यायेबलय् थुकिया ल्याः अझ अप्वयेफुगु खँ नं सूत्रं धाःगु दु ।

थ्वहे झ्वलय् पार्टीया वरिष्ठ नेता झलनाथ खनालयात मेम्ह वरिष्ठ नेता माधव नेपाल स्वयां क्वय्या वरियताय् तयेयंकूगु खँय् विवाद पिहां वःसां उकियात संशोधन धाःसा मयाइगु खँ नं सूत्रं धाःगु दु ।

खनालं थःत नेपाल स्वयां क्वय् तयेयंकल धकाः विरोध यासें थ्व वरियतायात स्वीकार मयायेगु खँ धयादीगु खः । तर पार्टीं वरियताय् वय्कःयात क्वय् तःगु गलत जूगु खः धकाः स्वीकार यासें आःयात थ्वहे वरियता कायम यायेगु जुइ धायेधुंकूगु दु । सूत्रया कथं खनालं नं उकियात स्वीकार यानादीधुंकूगु दु । पार्टीपाखें वरियता निर्धारणय् गल्ती जूगु स्वीकार यायेवं खनाल माने जूगु सूत्रया दावी दु ।

सम्बन्धित बुखँ

LEAVE YOUR COMMENTS