स्वीच्याक्वःगु नेपालभाषा साहित्य तःमुँज्या लामुगालय्

ख्वप- स्वीच्याक्वःगु नेपालभाषा साहित्य तःमुँज्या थ्वहे वइगु कउलाथ्व द्वादशि व त्रयोदशि निन्हुयंकं लामुगालय् जुइगु जूगु दु । नेपालभाषा साहित्य तःमुँज्याया नायः जनकवि चन्द्रबहादुर उलकया सभापतित्वय् जूगु स्थानीय साहित्यकार, कलाकार व जनप्रतिनिधितय् मुँज्यां थुगुसी देसं पिने कमलविनायक आवास क्षेत्र रोहित निवासय् उगु तःमुँज्या यायेगु क्वःछिउगु खः ।

उगु मुँज्यां नरेश खत्रीया संयोजकत्वय् ४३ म्ह दुजः दुगु स्वीच्याक्वःगु नेपालभाषा साहित्य तःमुँज्या ग्वसाः खलः नं नीस्वंगु दु ।मुँज्यां ग्वसाः खलःया न्वकु केवी प्रजापति, छ्याञ्जे सुन्दर राजचल, लिउ छ्याञ्जे अमोद उलक, दांभरि जितेन्द्र मुनंकःमि व लिउ दांभरी पदय् कृष्णनारायण दुमरुयात ल्यःगु दु ।

स्थानीय मुँज्याय् नेमकिपाया अध्यक्ष नारायणमान बिजुक्छेँ रोहितं आः तःमुँज्यायात सामाजिक जागरणया दबू दयेकेमाःगु सुझाब बियादिल । वय्कलं समाजय् थीथी कथंया अन्धविश्वास व्याप्त जुयाच्वंगुलिं तःमुँज्याया दबूयात अन्धविश्वासं जनतायात मुक्त यायेगु छगू सांस्कृतिक दबू कथं छ्यलेमाःगु खँ कनादिल ।

मुँज्याय् नेमकिपाया सचिव सांसद प्रेम सुवालं तःमुँज्या जनताया पक्षय् सः थ्वयेकीगु व सार्वभौमिकता रक्षाया लागिं जनतायात सचेत याइगु दबू जूगु खँ कनादिल । ज्याझ्वलय् प्रदेश नम्बर ३ या सांसद सुरेन्द्रराज गोसाइँ, प्रदेश ३ या सांसद सृजना संैजू, नेमकिपा ख्वप नगर समितिया अध्यक्ष नारायणबहादुर दुवाल व तःमुँज्याया संस्थापक अध्यक्ष कान्छा वासुकलां नं न्ववानादीगु खः ।

सम्बन्धित बुखँ

LEAVE YOUR COMMENTS