नवीनप्रकाशया ह्याउँ स्वां हि पिदन
येँ (नेपालभाषा टाइम्स) – कवि नवीनप्रकाश श्रेष्ठया चिनाखँ मुना सफू ‘ह्याउँ स्वां हाकुगु हि’ पिदंगु दु। वंगु शनिवाः थन जूगु छगू ज्याझ्वःया दथुइ बागमति प्रदेश सांसद राजेन्द्रमान श्रेष्ठ व मध्यपुर थिमि नगरपालिकाया प्रमुख मदनसुन्दर श्रेष्ठं मंकाःकथं पितब्वज्या यानादीगु खःसा कवि श्रेष्ठया मां लक्ष्मीकेशरी श्रेष्ठं सफूया द्यबः किपा उलेज्या यानादीगु खः ।
ज्याझ्वलय् नवासें बागमति प्रदेश सांसद श्रेष्ठं सफुतिइ सामाजिक विसंगति व विकृति विरुद्धया सःयात कयाः चिनाखँया माध्यमं अभिव्यक्ति प्वंकातःगु व जातीय उत्पीडन व भाषिक अधिकारया विषययात कयाः नं अभिव्यक्ति प्वंकातःगु खँ कनादिल । राजनीतिक विकृतिया सम्बन्धय्च्व यातःगु चिनाखँयात कयाः सकलें राजनीनिकर्मियात छगू हे दृष्टिं स्वये मजिउगु तर्क नं वय्कलं तयादीगु खः ।
नगरप्रमुख श्रेष्ठं नेपालभाषां पिहां वःगु साहित्यिक सफुतिं भाषिक संरक्षण व साहित्यया विकासया निंतिं तःधंगु ग्वाहालि याइगु विश्वास प्वंकादिल । नगरपालिका स्वयं हे भाषा, कला, संस्कृति, सम्पदा संरक्षणया ज्याय् लगे जुयाच्वंगु चर्चा यानादिसें नगरप्रमुख श्रेष्ठं चिनाखँय् व्यक्त यानातःगु भावनां थःपिंत अझ जिम्मेवार जुइत सचेत याःगु खँ कनादिल ।
प्राज्ञ धुर्व मधिकःमिं सफूया समालोचनात्मक समीक्षा यानादिसें पितब्वज्या जूगु सफू नेपालभाषा साहित्यय् यक्व लिपा कोश ल्वहं जूगु धयादिल । ज्याझ्वः राष्ट्रिय अभिलेखालयया निमित्त महानिर्देशक सौभाग्य प्रधाना·या सभापतित्वय् जूगु खः ।
LEAVE YOUR COMMENTS