स्वीगुक्वःगु नेपालभाषा साहित्य तःमुँज्याय् थीथी ब्यक्तियात सम्मान

ख्वप – स्वीगुक्वःगु नेपालभाषा साहित्य तःमुँज्या स्थानीय ज्येष्ठ नागरिक १०० दँ दुम्ह गोपसिं बोय्जूं उलेज्या यानादिल । ज्याझ्वलय् हास्य कलाकार धुर्वरत्न हाडा व जनताया डाक्टर अशोकानन्द मिश्रयात मूपाहां नेपाल मजदुर किसान पार्टीया केन्द्रीय अध्यक्ष नारायणमान बिजुक्छेँ रोहितं दोसल्लां न्ययेकाः नगदसहित हनादीगु खः ।

ज्याझ्वलय् मूपाहां रोहितं जनताया सेवा याइपिं भिंपिं मनूतय् सम्मान यायेगु परम्परां मेपिंत नं जनताया सेवा यायेगु प्रेरणा प्राप्त जुइ धयादिल । नेमकिपाया सांसद प्रेम सुवालं चीनया ‘बेल्ट एण्ड रोड इनिसियटिभ’ परियोजनायात अमेरिका नापं पश्चिमा देशं गलत रुपं प्रचार यानाच्वन धासें ‘मिलिनियम च्यालेन्ज कर्पोरेशन’य् नेपाली कांग्रेसं हस्ताक्षार याःगु गलत जुल धयादिल ।

ख्वप नगरपालिकाया मेयर सुनिल प्रजापतिं ख्वप क्यान्सर अस्पताल ब्यवस्थापनया जिम्मेवारी कयाः ख्वप नगरपालिकां थःगु कर्तब्य प्रस्तुत याःगु खँ कनादिलया उपमेयर रजनी जोशीं नेमकिपाया चुनावी घोषणापत्रकथं हे थःपिसं जनताया सेवा यानाच्वनागु खँ कनादिल । वरिष्ठ अधिवक्ता कृष्णप्रसाद भण्डारीं संघीयताया प्रयोग बांलाक मजू धयादिल ।

संस्कृतिविद् तेजेश्वरबाबु ग्वंगलं ‘जनता म्वाःसा, भाषा म्वाइ’ धइगु धारणायात हरेक ब्यक्तिं मनन याये फयेकेमाः धयादिल । पुलांम्ह न्या. गौरीबहादुर कार्कीं देशय् इमान्दार, जनताया सेवा याइपिं नेतात मालाच्वंगु खँ कनादिलसा संस्कृतिविद् हरिराम जोशीं धर्म, संस्कृति, भाषा, साहित्य व इतिहासयात ल्यंका तयेत शासन ब्यवस्था व स्थानीय निकायं पहल यायेमाः धयादिल ।

ज्याझ्वलय् साहित्यकार मोहन दुवाल, डा. सरोज धिताल, कवयित्री इन्दिरा प्रसाई, नरेन्द्र प्रसाईं, सुलोचना मानन्धर, लक्ष्मण राजवंशी, ख्वपया प्रजिअ नारायणप्रसाद भट्ट, राजदास श्रेष्ठ, प्रेमसिं बस्न्यातपिंसं नुगःखँतयादीगु खः ।

अथेहे हरिहर तिमिल्सिना, टेक राना, अभय श्रेष्ठ, प्रेम के. निडरपिंसं चिनाखँ न्यंकादीगु खःसा सातिकुन्हुया ज्याझ्वलय् दाफा भजन गुरु गोपसिं बोय्जू, खिं गुरु हरिभक्त सुवाल, बासुरीगुरु काजीलाल बोय्जू व दाफा भजनया म्येँ गुरु लक्ष्मीभक्त ब्याञ्जूपिंत मूपाहां रोहितं दोसल्लां न्ययेकाः हनादीगु खः ।

पाठ जूगु रचनामध्ये च्वखँ विधाय् एल. के. सुन्दर न्हाप, प्रेम के. निडर लिउ व ओम धौभडेलयात विशेष सिरपाः लःल्हाःगु खः । अथेहे चिनाखँ विधाय् केशव तमखू न्हाप, भक्तलक्ष्मी भासिमा लिउ व सुनिता गाईसी लियांलिउ लाःगु खःसा पृथ्वीकुमार प्रजापतियात हःपाः सिरपाः लःल्हाःगु खः ।

निन्हुयंकं जूगु ज्याझ्वलय निन्हुं हे सांस्कृतिक ब्वज्या नं न्ह्यब्वःगु खः । नेपालभाषा साहित्य तःमुँज्या गुथिपाखें थुकथंया सम्मेलन याना वयाच्वंगु दु ।

सम्बन्धित बुखँ

LEAVE YOUR COMMENTS