भुखाय् पीडितयात झिदँ तक हे २ प्रतिशत ब्याज

येँ – नेपाल राष्ट्र बैंकं आः भुखाय् पीडित जनतायात २ प्रतिशत ब्याजय् हे झिदँ तक त्यासा बीगु जूगु दु । राष्ट्र बैंकं भुखाय् पीडित लिसें खुसिबाः व मिं नयाः पीडित जूपिंत बीगु आवास त्यासाया ई नं झिदँ यायेगु तयारी यानाच्वंगु दु ।

सरकारं दयेकूगु पुनर्कर्जा सम्बन्धी कार्यविधि व बैंक व वित्तीय संस्था सम्बन्धी ऐन (वाफिया) थवंथवय् ल्वाःगुलिं २ प्रतिशत ब्याजदरय् हे भुखाय् पीडितयात झिदँ तक पुनर्कर्जा बीगु कथं न्हूगु व्यवस्था यायेत्यंगु खँ राष्ट्र बैंकया डेपुटी गभर्नर चिन्तामणि सिवाकोटीं कनादीगु दु । वय्कलं पुनर्कर्जाया ई अप्वयेकेत वाफिया हे संशोधन यायेत्यनागु जानकारी नं बियादिल । पुनर्कर्जाया ई अप्वयेकेत वाफिया संशोधन यायेगु निंतिं अर्थ मन्त्रालय सकारात्मक जूगु खँ नं वय्कलं कनादीगु दु ।

अर्थ मन्त्रालय सकारात्मक जुइवं ऐन संशोधन यायेगु तयारी राष्ट्र बैंकं याःगु खः । न्हापा सरकारं झिदँया निंतिं २ प्रतिशत ब्याजदरं त्यासा बीगु धाःगु खःसां वाफिया ऐन वयेधुंकाः उकिया ई निदँ जक जूवंगु खः । थुकिं यानाः थप मर्काय् लाःवंपिं भुखाय् पीडित जनतां राष्ट्र बैंक व अर्थ मन्त्रीयात थःपिनिगु समस्या बारे जानकारी याकूगु खः । उमिगु समस्यायात कयाः अर्थमन्त्री युवराज खतिवडा सकारात्मक जुइवं ऐन संशोधनया लँपु चाःगु खँ सूत्रं धाःगु दु ।

राष्ट्र बैंकं २ प्रतिशत ब्याजं दइगु पुनर्कर्जाया ई निदँ जक जुइ धायेवं भुखाय् पीडित जनतां बैंकया ब्याजदर सरह किस्ता पुले मफइगु खँ धासें बैंकयात पुलेमाःगु ब्याज तकं पुलेगु बन्द याःगु खः । उखे वाणिज्य बैंकं पीडित जनताया छेँबुँ लिलाम यायेगु खँ पिहां वयेवं राष्ट्र बैंकं सर्कुलर छ्वयाः मेगु निर्णय मजूतले लिलाम प्रक्रिया दिकि धकाः निर्देशन बिउगु खः ।

थ्वहे झ्वलय् थीथी बैंकय् त्यासा कयातःपिं भुखाय् पीडित जनतां बैंकयात तत्काल साँवा ब्याज मपुलेगु खँ धासें वइगु शनिवाः छगू सहलह ज्याझ्वः यायेत्यंगु दु । थःपिंसं कयातयागु त्यासाया बारे सरकारयात दबाब बीगु कथं साँवा ब्याज मपुलेगु तयारी यानाच्वनागु खँ यलया भुखाय् पीडित यज्ञरत्न वज्राचार्यं ‘नेपालभाषा टाइम्स’ यात कनादिल ।

सरकारं थःपिंसं कयातयागु त्यासायात कयाः वाणिज्य बैंकतय्त छेँबुँ लिलाम याये मते धकाः निर्देशन बीधुंकाः मेगु छुं कथंया सरकारी निर्णय मवःगुलिं थुकथं त्यासा मपुलेगु आन्दोलन न्ह्याकेत्यनागु जानकारी नं वय्कलं बियादिल ।