हरिशंकर नारायणया देगःया उलेज्या

ख्वप(नेपालभाषा टाइम्स)- ख्वप नगरपालिका वडा नं. ८य् निर्माण जूगु हरिशंकर नारायणया देगःया उलेज्या याःगु दु । ख्वप नगरपालिकाया प्रमुख सुनिल प्रजापतिं देगःया उलेज्या यानादीगु खः ।

ज्याझ्वलय् नवासें नगर प्रमुख प्रजापतिं संस्कृति, सम्पदाया संरक्षण विदेशी ग्वाहालि मकासे झीपिं थः हे जानाः यायेमाःगु खँय् सकसिनं ध्यान बीमाः धयादिल । वय्कलं मेपिनिगु जक ग्वाहालि कयाः ज्या यायेगु बानी झी थःपिं अल्सि जक जुइ धासें फत्तले सकतां ज्या नगरपालिकां स्थानीय जनताया ग्वाहालि कयाः थःगु हे स्रोत साधनं यायेगु कुतः यानाच्वनागु दु धयादिल ।

नगरया सांस्कृति सम्पदात ल्यंका तयेया निंतिं स्थानीय जनताया नं ज्वःमदुगु ग्वाहालि प्राप्त जुयाच्वंगु खँ न्ह्यथनादिसें नगर प्रमुख प्रजापतिं जनप्रतिनिधि, कर्मचारी व स्थानीय जनताया मंकाः कुतलं हे थौं ख्वप देय् प्रशंसा योग्य व उदाहरणीय जुया वनाच्वंगु खः धयादिल । लिसें वय्कलं पुनःनिर्माणय् पारदर्शिता व इमान्दारिता हे जनविश्वास आधार जूगु खँ धयादिल ।

सहरी विकास तथा भवन विभागया प्रमुख काशीनाथ अधिकारीं ख्वप नगरपालिकाया निंतिं पुनःनिर्माण प्राधिकरणपाखें ५ गू करोड विनियोजन याःगु खःसां नं न्यय्गू लख जक प्राप्त जूगु व थुकिं निगू योजना संचालन यायेत ताःलाःगु व उकीमध्ये छगू योजना हरिशंकर नारायणया देगः जूगु जानकारी बियादिल ।

ख्वप नगरपालिका ८ वडाअध्यक्ष कृष्णप्रसाज कोजूया सभापतित्वय् जूगु ज्याझ्वलय् पुलांम्ह वडाअध्यक्ष महेन्द्र खाय्मली, गणेजु दाफा भजन नाइके कृष्णहरी गणेजु, नगरपालिकाया सम्पदा शाखा प्रमुख राम गोविन्द श्रेष्ठ र वडा सदस्य सुमित्रा बोहजु लगायतं सम्पदा संरक्षणया विषयय् नुगःखँ तयादीगु खः ।