तुकुचाय् दयेकातःगु संरचना मथुनेत अन्तरकालीन आदेश

येँ (नेपालभाषा टाइम्स)- उच्च अदालतं तुकुचा खुसि अतिक्रमण यानाः दयेकातःगु संरचना मथुनेत अन्तरकालीन आदेश जारी याःगु दु । प्रेसिडेन्ट ट्राभल्स एण्ड टुर्स प्रालिया पाखे भोलोविक्रम थापां दायर याःगु रिटयात कयाः सुनुवाई यासें न्यायाधीश दिपेन्द्रबहादुर बमया इजलासं तुकुचा खुसि अतिक्रमण यानाः दयेकातःगु संरचना तत्काल मथुनेत अन्तरकालीन आदेश जारी याःगु खः ।

प्रक्रिया कथं नक्सा पास याःगु व निर्माण सम्पन्नया प्रमाणपत्र तकं कयातःगु खनेदुगुलिं तत्काल संरचना मथुनेत आदेश बिसें निगुलिं पक्षयात सहलहया नितिं अदालतं असोज ५ गते सःतूगु दु ।

येँ महानगरपालिकां तुकुचा खुसि मालेगु धासें हात्तिसार निसें कमलादि तक खुसि अतिक्रमण यानाः दयेकातःगु संरचना थुनेत ३५ न्हुया सुचं बिउगु खः । थ्व धुंकाः न्यान्हु न्ह्यः जय नेपाल हलया कम्पाउण्डय् म्हुइगु सुरु याःगु खःसा कम्पाउन्ड क्वं तुकुचा खुसि न्ह्याः वनाच्वंगु नं लुइकूगु खः । थ्वहे झ्वलय् म्हिगः नं येँ महानगरपालिकां हात्तिसार क्षेत्रय् तुकुचा खुसि मालेगु ज्या याःगु दु ।