गल्ती जूसा भिंकेगु प्रमया बचं

४ गतेया प्रदर्शन भव्य यायेत थाय्थासय् जुलुस

येँ – गुथि सम्बन्धी विधेयकय् गनं द्वनाच्वंगु दुसा उकियात भिंकेगु खँ प्रधानमन्त्री केपी शर्मा ओलीं धयादीगु दु । युरोप भ्रमणं लिहां वयाः पत्रकारतलिसे खँ ल्हायेगु झ्वलय् वय्कलं विधेयकय् भूलवश गनं गल्ती जूसा भिंकेगु प्रतिवद्धता प्वंकादीगु खः । पत्रकारतय्त सम्बोधन यासें
वय्कलं विधेयकयात कयाः जुयाच्वंगु विरोध व आन्दोलन यानाच्वंपिंत अवसर मालेगु ज्या मयायेत नं इनाप यानादिल ।

गुथिया नामं गुलिखे थासय् शोषण जुयाच्वंगु अवस्था दु धासें वय्कलं अज्याःगु खँयात सम्बोधन यायेत स्वयागु दावी यासें धयादिल, ‘सांस्कृतिक रुपं स्वानाच्वंगु गुथिया खँ बिस्कं खः ।’

प्रदर्शन जारी
मेखे गुथि विधेयकयात कयाः स्वनिगलय् धाःसा विरोध प्रदर्शन जारी हे जुयाच्वंगु दु । म्हिगः नेपाली कांग्रेसं येँया महाद्यः पार्वती दबुली धर्ना बिउगु दु । धर्नाया झ्वलय् ‘धर्म, संस्कृति व परम्पराय् जुयाच्वंगु आक्रमण बन्द या, गुथि विधेयक खारेज या’ धइगु प्लेकार्ड प्रदर्शन याःगु खः । धर्ना लिपा वंघलय् सभा नं याःगु खः ।

सभायात सम्बोधन यासें सांसद राजन केसीं स्वनिगःया नेवाःतय् गुथियात हस्तक्षेप यायेगु धइगु थनया संस्कृति संस्कार आदि म्हासे यायेगु खः धासें गुथि विधेयक तत्काल लित कायेमाःगु माग यानादिल ।उगु हे सभाय् नेकां नेता प्रकाशमान सिंह व सांसद गगन थापां नं सम्बोधन यानादीगु खः ।

काभ्रेय् ३ गते प्रदर्शन
थ्वहे झ्वलय् गुथि विधेयकयात कयाः कन्हय् असार ३ गते काभ्रेय् नं वृहत प्रदर्शन यायेगु तयारी जुयाच्वंगु दु । काभ्रेया स्थानीय वासिन्दां परम्परागत गुथिया जग्गा म्हासे याये दइ मखु धासें उगु प्रदर्शन यायेत्यंगु खः ।

स्थगन या ः योगेश भट्टराई
थ्वहे झ्वलय् नेकपाया नेता योगेश भट्टराईनं गुथि विधेयक स्थगन यायेमाःगु माग यानादीगु दु । वय्कलं म्हिगः छगू ट्वीट यासें उगु माग यानादीगु खः । गुथि विधेयकयात कयाः छुं मनूतय्सं स्वच्छ रुपं विरोध यानाच्वंगु खःसां थुकी थीथी कथंया तत्व दुहां वयाच्वंगु खँ वय्कलं धयादीगु दु ।

गुथि विधेयकयात कयाः जुयाच्वंगु विरोधय् राजावादीत दुहां वयाः आन्दोलनयात मेखे यंकेगु कुतः जुयाच्वंगुलिं गुथि विधेयक स्थगन यायेमाःगु माग वय्कलं यानादीगु खः ।

जनकपुरय् प्रदर्शन ः
गुथि विधेयकयात कयाः जनकपुरय् नं प्रदर्शन जूगु दु । जनकपुरया साधु–सन्ततय्सं म्हिगः प्रदर्शन याःगु खः । गुथि विधेयकं धर्म संस्कृतिइ प्रहार जूगु धासें ¥याली पिकाःगु खः । प्रदर्शनय् ‘संघीय सरकार मुर्दावाद, गुथि विधेयक लित का, केपी ओली मुर्दावाद’ धइगु नारा थ्वयेकूगु खः । थीथी थाय् चाःहिले धुंकाः ¥याली जिल्ला प्रशासन ज्याकुथी वनाः प्रमुख जिल्ला अधिकारीयात ज्ञापन पौ बिउगु दु ।

कन्हय् थाय्मरुइ कोणसभा
उकथं हे गुथि विधेयकयात कयाः कन्हय् थाय्मरुइ कोणसभा याइगु जूगु दु । थ्व सभाय् नागरिक एकता समाजया ग्वसालय् जुइगु खँ धाःगु दु ।

कलाकारतय् आह्वान
थ्वहे झ्वलय् नेवाः सांगीतिक ख्यःया नांजाःपिं कलाकारपिसं वइगु असार ४ गते माइतीघर मण्डलाय् जुइगु प्रदर्शनय् ब्वति कायेत इनाप यासें सामाजिक सञ्जालय् थःपिनिगु धापू पोष्ट याःगु दु । नांजाःपिं कलाकार संजय श्रेष्ठ, भीम तुलाधरपिंसं आन्दोलनय् ब्वति कायेत इनाप यासें पोष्ट याःगु खः ।

थीथी थासय् विरोध
गुथि विधेयकयात कयाः पन्तिइ विरोध सभा जूगु दुसा थिमिइ मशाल जुलुस पिकाःगु दु । ख्वपय् म्हिगः बहनी विरोध सभा जूगु दु । उकथं हे थौं थिमिइ विरोध सभाया ज्याझ्वः दुसा भ्वतय् कन्हय् विरोध जुलुस जुइगु जूगु दु ।४ गतेया तयारी बारे सहलह यायेत म्हिगः फुक्कं संघर्ष समितिया दुजःपिं मुनाः नारा व आन्दोलनया अवधारणा तय याःगु खः ।

राष्ट्रिय सभाय् संशोधन दर्ता

विवादित गुथि विधेयक भिंकेत राष्ट्रिय सभाय् सांसदतय्सं संशोधन प्रस्ताव दर्ता याःगु दु । नेपाली कांग्रेसया सांसद राधेश्याम अधिकारी व राष्ट्रिय जनता पार्टी (राजपा) या सांसद रमेशप्रसाद यादवं विवादित दफात चीकेत संशोधन प्रस्ताव दर्ता याःगु खः ।

विधेयकय् दुगु ‘थःगु हे लगानीइ पूर्वाधार संरचना दयेकाः बालं बीगु व सार्वजनिक–निजी साझेदारी वा निजी लगानीइ पूर्वाधार संरचना दयेकाः सञ्चालन हस्तान्तरण यायेगु कथं लिजय् बीगु’ व्यवस्था चीकेत नं संशोधन प्रस्ताव तःगु खः ।

सम्बन्धित बुखँ

LEAVE YOUR COMMENTS