भण्डारीयात ओलीया लसकुस !
येँ (नेपालभाषा टाइम्स)÷ नेकपा एमालेया अध्यक्ष केपी ओलीं पुलांम्ह राष्ट्रपति विद्यादेवी भण्डारी सक्रिय राजनीतिइ लिहां वल धाःसा वय्कःयात लसकुस यायेगु खँ धयादीगु दु । एमाले कोशी प्रदेश कमिटीया पूर्ण बैठकयात म्हिगः सम्बोधन यासें वय्कलं भण्डारी राजनीतिइ वये चाहे जुल धाःसा सुनां नं मपनीगु खँ धयादीगु खः ।
सम्बोधनय् अध्यक्ष ओलीं धयादिल, ‘पार्टीया ज्याय् सक्रिय जुइगु चाहना क्यनाः वल धाःसा वय्कःयात झीसं निषेध यायेगु जुइमखु । वय्कः वयाः बांलाक नेतृत्व याःसा ठीक हे दु। तर, वय्कलं वये धकाः धायेमाल, वय्कःयात न्ह्याबलें लसकुस दु । वय्कलं राजनीति याये धाःसा पनीम्ह सु ? सुनां पने फइ ? गुकथं पनी ?’
उकथं हे अध्यक्ष ओलीं पुलांम्ह राष्ट्रपतियात पार्टीया नेतातय्सं नापलायेवं म्वाः मदुगु हल्ला न्यंकेगु बांलाःगु खँ मखु धासें राष्ट्रपति भण्डारी पार्टीया पुलांम्ह नं उपाध्यक्ष खः, उकिं वय्कःयात नापलायेगु तःधंगु खँ मखु धयादीगु दु ।
थ्व स्वयां न्ह्यः अध्यक्ष ओलीं पुलांम्ह राष्ट्रपति भण्डारी राजनीतिइ वये मजिउ धयादीगु खः । वंगु साउन २९ गते केन्द्रीय ज्याकू च्यासलय् च्वंगु सचिवालयया बैठकय् अध्यक्ष ओलीं अज्याःगु खँ धयादीगु ख ः।
सचिवालय बैठकय् अध्यक्ष ओलीं धयादीगु खः, ‘राष्ट्रपति जुइधुंकूम्ह मनू राष्ट्रिय सम्मानय् च्वनेमाः । हाकनं राजनीतिइ वयेगु बांलाःगु खँ मखु । सुनानं अज्याःगु चाहना तये मजिउ ।’
बैठकय् ओलीं पुलांम्ह राष्ट्रपति भण्डारीयात राजनीतिइ हयेगु कुतः याइपिंत कारबाही यायेमाःगु ख्याच्वः समेत बियादीगु खः । तर म्हिगःया ज्याझ्वलय् धाःसा वय्कलं भण्डारीयात लसकुस यायेगु धयादिल ।
LEAVE YOUR COMMENTS