बाहिरी चक्रपथया लँ हिलीगु
येँ – बाहिरी चक्रपथया लँ लाइगु जग्गाय् भू माफियातय्सं चलखेल याःगुलिं आः शहरी विकास मन्त्रालयं उगु चक्रपथया लँ हे हिलेगु तयारी यानाच्वंगु दु । भूमाफियातय्सं चोभार–सतुंगः खण्डय् व्यापक चलखेल याःगु सीदुगु दु ।
उगु खण्डय् भूमाफियातय्सं जग्गा चिकू जुइक कित्ताकाट यानातःगुलिं रिंगरोडया लँ हिलेमाःगु खँ मन्त्रालयं धाःगु दु । मन्त्रालयया कथं आः दयेकाच्वंगु खण्डं १०० मिटर जःखः चक्रपथयात हीकाः दयेकेत्यंगु दु ।
बाहिरी चक्रपथ आयोजनां पाइलट प्रोजेक्टया रुपय् चोभाः निसें सतुंगः तक ७ किलोमिटर खण्डय् ज्या न्ह्याकेत्यंगु खःसा तर उगु खण्डय् भूमाफियातय्सं ३ आनाया आपालं जग्गा कित्ताकाट याना तयेधुंकूगुलिं आः लँ हिलेगु योजना सरकारं दयेकूगु खः ।
७८०० रोपनी जग्गा अधिग्रहण यायेमाःगु उगु पाइलट प्रोजेक्टय् दुगु लागाय् ७६ खा छेँ नं लायेत्यंगु दु । थ्व छेँयात जक १ अर्ब तका मुआब्जा बीमाःगु खँ दु । भूमाफियातय्सं अन २९५३ कित्ता जग्गा ३ आनाया दरं कित्ताकाट याना तयेधुंकूगु दु ।
थ्वहे झ्वलय् शहरी विकास मन्त्रालयं उपत्यका विकास प्राधिकरण आयुक्त भाइकाजी तिवारीयात इलय् हे जग्गा कित्ताकाट मयाःगु खँय् स्पष्टीकरण काःगु खँ सीदुगु दु । सूत्रया कथं उगु लागाय् चक्रपथ विस्तार जुइ न्ह्यः तिवारीं हे थः मनूतय्त जग्गा न्याकाः उकथं कित्ताकाट याका तःगु खः । उगु लागाया आपालं जग्गा तिवारी तकं दुथ्याःगु भूमाफियातय्सं थ्व ज्या यानाच्वंगु व उकियात तिवारीं गोप्य सूचना बियाः साथ बियाच्वंगु द्वपं थ्वया न्ह्यः नं लानाच्वंगु खः ।
बाहिरी चक्रपथ सडकया जवं खवं २५÷२५ मिटर यानाः ५० मिटरया आधुनिक सडक दयेकेगु योजना सरकारं दयेकाच्वंगु दुसा स्थानीय नेवाःतय्सं सरकारया थ्व योजना लागू याये दइ मखु धकाः विरोध यानाच्वंगु दु ।
LEAVE YOUR COMMENTS