इजरायलं हाकनं गाजा क्षेत्रय् आक्रमण यात

एजेन्सी( इजरायलं हाकनं गाजापट्टी क्षेत्रय् आक्रमण याःगु दु । इजरायलं गाजापट्टीइ हमासतय्गु थासय् हवाइ आक्रमण याःगु खः । इजरायलया सुरक्षा बलं हमासं मि च्याइगु बेलुन प्रहार याःगुलिं थःपिंसं जवाफी कारवाही यानागु धाःगु दु । इजरायलं धाःकथं गाजापट्टी क्षेत्रं मंगलवाः मि च्याइगु बेलुनं प्रहार याना हःगुलिं थाय्थासय् मिं नःगु दु ।

अन्तर्राष्ट्रिय सञ्चार माध्यमं बिउगु जानकारीकथं बुधवाः सुथंनिसें इजरायलं गाजापट्टीइ आक्रमण याःगु खः । इजरायलया सेनां गाजा क्षेत्रय् आतंकवादी गतिविधि जुयाच्वंगु व उकियात पनेत सेना तयार दुगु धाःगु दु । आक्रमणय् मानवीय क्षति धाःसा जूगु मदुनि ।

मंगलवाः यहुदी राष्ट्रवादीतय्सं पूर्वी जेरुसेलमय् जुलुस पिकायेधुंकाः तनाव शुरु जूगु खः । सन् १९६७ इ सहरय् कब्जा याःगु न्हिया लुमंतिइ यहुदी राष्ट्रवादीतय्सं जुलुस पिकाःगु खःसा हमासं जुलुस पिमकायेत ख्याच्वः बिउगु खः । इजरायल व हमासया दथुइ वंगु मे महिनाय् २१ न्हु तक युद्ध जूगु खःसा सम्झौता लिपा युद्धविराम जूगु खः । युद्धय् २५०म्ह सिबें अप्वः मनूत सीगु खः।

इजरायलय् न्हूगु सरकार वयेधुकाः हमास व इजरालयया दथुइ न्हापांखुसी थथे झडप जूगु खः ।