कांग्रेसय् थौं मतदान

येँ – नेपाली कांग्रेसया झिंप्यक्वःगु तःमुँज्याया झ्वलय् थौं चुनाव जुइगु जूगु दु । म्हिगः निर्वाचन समितिं मतदानया नितिं लिपांगु धलः पिथंगु खः । शनिवाः उम्मेदवारी दर्ता याःपिं मध्ये म्हिगः ५७ म्हेस्यां नां लित काःगु दु । शनिवाः मुक्कं ५४८ म्हेस्यां उम्मेदवारी दर्ता याःगु खः ।

कांग्रेसया आः न्हूगु केन्द्रीय कार्य– समिति १६७ सदस्यीय जुइ । उकी छम्ह सभापति, निम्ह उपसभापति, निम्ह महामन्त्री दइसा च्याम्ह सहमहामन्त्री दइगु व मेपिं केन्द्रीय दुजः जुइ । म्हिगः तक सभापतिया नितिं न्याम्हेस्यां नां दर्ता याःगु दु । सभापति लिसें प्रधानमन्त्री शेरबहादुर देउवा, पुलांम्ह महामन्त्री प्रकाशमान सिंह, शेखर कोइराला, पुलांम्ह महामन्त्री विमलेन्द्र निधि व कल्याणकुमार गुरुङं उम्मेदवारी बिउगु खः । थुकी मतदान जुइबलय् ५० प्रतिशत मत हःम्ह उम्मेदवार विजयी जूगु व्यवस्था दु । यदि सुनानं ५० प्रतिशत स्वयां अप्वः मत हये मफुत धाःसा दकलय् अप्वः मत हःपिं निम्हे–सिया दथुइ निगूगु चरणया मतदान जुइ ।

थ्वहे झ्वलय् प्रम लिसें सभापति देउवां थः सभापति पदय् हानं त्यात धाःसा पार्टीयात पुलांगु हे अवस्थाय् थ्यंकेगु खँ धयादीगु दु । म्हिगः येँय् जूगु छगू ज्याझ्वलय् न्ववासें प्रम देउवां केन्दं्र निसें स्थानीय तह तक कांग्रेस नेतृत्वया सरकार दयेकेगु दावी नं यानादीगु खः । वय्कलं धयादिल, ‘देय्यात कम्युनिष्ट शासनं मुक्त यायेमाःगु दु, विशेष कथं ओलीपाखें मुक्त यायेमाःगु दु, आः

केन्दं्रनिसें स्थानीय तहलय् कांग्रेस सरकार दयेकेगु ज्या जुयाच्वंगु दु, आः निर्वाचन लिपा हाकनं केन्द्र, प्रदेश व स्थानीय तहलय् सरकार दयेकाः कांग्रेसयात पुलांगु हे अवस्थाय् हयेत सफल जुइ, अथे जुयाः सभापति पदय् जि व जिगु टिमयात त्याकादिसँ ।’

थ्वहे झ्वलय् सभापतिया उम्मेदवार विमलेन्द्र निधिं थौं जुइगु सभापतिया निर्वाचनय् सुं नं विजयी मजुइगु दावी यानादीगु दु । तःमुँज्या जुयाच्वंगु थाय् भृकुटी मण्डपय् म्हिगः पत्रकारतलिसे खँ ल्हासें निगूगु चरणया चुनावय् सभापति देउवा इतर पुचलं त्याकीगु खँ वय्कलं धयादीगु दु । वय्कलं चुनावया निगूगु चरणय् थः, शेखर कोइराला व प्रकाशमान सिंह छथाय् च्वनाः न्हूगु नेतृत्व ल्ययेगु खँ नं धयादीगु दु ।
उकथं हे सभापति उम्मेदवार निधिं वरिष्ठ नेता रामचन्द्र पौडेलयात सभापतिइ निर्विरोध प्रस्ताव याःगु खःसा पार्टीया क्वय्या तहलय् न्हूगु सन्देश वनीगु खःसां नं देउवाया नेतृत्वं पौडेलयात अलग तयेगु कुतः याःगु द्वपं बियादिल । उकथं हे निधिं सहमतिया नितिं निर्वाचन ज्याझ्वः छन्हु निन्हु स्थगित यानाः अझ नं पौडेलया नामय् सहमति याये फइगु सम्भावना दनिगु खँ नं धयादीगु दु । उकथं हे वय्कलं कांग्रेसया नेतृत्व हिल धाःसा न्यागू राजनीतिक दलपाखें न्हूम्ह प्रधानमन्त्री वइगु खँ नं धयादीगु दु ।

सम्बन्धित बुखँ

LEAVE YOUR COMMENTS