हनुमानध्वाखाया आगंछेँ नं स्थानीयं दयेकीगु
येँ – हनुमानध्वाखा दरवार लागाय् च्वंगु आगंछेँया पुनर्निर्माण स्थानीय समुदायपाखें याइगु जूगु दु । राष्ट्रिय पुनर्निर्माण प्राधिकरणया कुतलय् उपभोक्ता समितिपाखें आगंछेँया पुनर्निर्माण ज्या न्ह्याकेत जनप्रतिनिधि, स्थानीय समुदाय व जापान सरकार सहमत जूगु दु । राष्ट्रिय पुनर्निर्माण प्राधिकरणया प्रमुख कार्यकारी अधिकृत सुशील ज्ञवालीं ताः ई कुतः लिपा फुक्कं पक्षलिसे सहमति जूगु धासें आः आगंछेँया पुनर्निर्माण याकनं न्ह्याइगु विश्वास प्वंकादिल ।
वय्कलं निर्देशक समिति, प्राविधिक समिति व उपभोक्ता समिति नीस्वनेगु जानकारी बियादिसें धार्मिक मान्यताया सम्मान लिसें परम्परागत शैली, प्रविधि व स्थानीय सामग्रीत छ्यलाः कालिगढपाखें आगंछेँ पुनर्निर्माण यायेगु खँ कनादिल । अथेहे संघीय संसदया सांसद कृष्णगोपाल श्रेष्ठं दीक्षित जूपिं बाहेक आगंछेँय् सुं हे दुहां वने मजिउगु खँ कनादिसें उकियात ध्यान तयेमाःगु खँ कनादिल ।
लिसें वय्कलं आगंछेँ दयेकेगु झ्वलय् आर्थिक पारदर्शिता कायम यायेमाःगु खँय् बः बियादिल । अथेहे प्रदेश सभाया सांसद राजेश शाक्यं स्थानीय समुदायया लिसें फुकसिया ग्वाहालि कयाः आगंछेँ पुनर्निर्माणया ज्या न्ह्याकेगु खँ कनादिल । भुखाय् लिपा क्षति जूगु संरचना पुनर्निर्माण यायेगु झ्वलय् आगंछेँ दयेकेगु जिम्मा जापान सरकारयात बिउगु खः ।
आगंछेँ पुनर्निर्माण जाइकापाखें जुइगु जुइवं स्थानीय वासिन्दाया लिसें जनप्रतिनिधिपिंसं उकी असहमति क्यना वयाच्वंगु खः । स्थानीय वासिन्दां पुनर्निर्माण नेपाःया मौलिक कथं जुइमाःगु व उकिं थःपिं नं संलग्न जुइ दयेमाःगु माग याना वयाच्वंगु खः ।
LEAVE YOUR COMMENTS