
जिमि मांया नां मायादेवी मानन्धर अले बाःया नां इन्द्रनारायण मानन्धर । जि वि.सं. २००१ साल चैत महिनाया रामनवमि कुन्हु येँया बसन्तपू, पुण्यबहालय् बूगु खः । जि क्वहितिइ आखः ब्वं वनेगु, स्कुलया नां धाःसा ल्वःमन । सकलें सुकुलिइ झ्वःलिक फ्यतुनाः आखः ब्वनेगु । छगू किलासय् ब्वनालय् क्वथाय् ब्वनीपिं यक्व दु ।
जिमित ग्वरलय् आखः च्वकीगु । सिँयागु ग्वरलय् (ताचाहाकःगु पाताय्) न्हापां सियुचा पायेगु अले उकियात गंकाः, सलामं च्वयेगु । नमोबागिनिसें ककाकिकी तक च्वयेसल । अले ‘म्ह्याय्मस्तय्त आखः ब्वंकलकि इपिं स्यनी’ धकाः आखः ब्वंकेमछ्वल, छेँज्या जक याकातल । पसः वनेगु ज्या नं जिगु हे । श्राद्ध यायेत माःगु सकतां ज्वलं न्याये सः ।
बसन्तपुलिइ कुमारि छेँया न्ह्यःने दबुलिइ सिंचि द्वँद्वँ तयातइ, द्वं व सां फ्ययाच्वनी, जिपिं स्वया च्वनेगु । कुमारि सालीबलय् दशअवतार क्यनीगु देगलय् च्वनाः स्वयेगु, न्ह्यःनेसं च्वंगु गद्दी बैठकय् दुने सिंहासन दु, उकी जुजु व लानि फ्यतुइगु स्वयेत अप्वःथें देगलय् न्हापां हे वनाः च्वं वनेगु ।
जिमि बाः वैद्य ज्या सः । उकिं छेँय् क्यनेत वइपिं वयाच्वनी । बाःनं सक्व, वज्रयोगिनीया खरानी हयाः छगः तग्वःगु ग्लासय् तयातइ । मचा बुइके मफयाच्वंपिं, मचा बुइकाः दुरु मवःपिंत व खरानी कयाः पुयाः बियाछ्वइ । अरिं चाःपिं मस्तय्त व खरानीया सिन्हः तिका बी । मरुसतलय् न्हापा झ्वःझ्वः पसः दु, बाःनं थ्व थ्व वासः न्याना हजि धकाः भ्वँतय् च्वयाः बी ।
अले अनया बनिया पसलय् वासः न्याः वनेगु, इतुंबहालय् नं वासः न्याः वना । बाःनं छेँय् हे वासः दयेकाः क्यं वइपिंत बी । यंलाबलय् लछियंकं यलासेवा कलः वनेगु, कंगद्यः पुज्यायेगु । विष्णुमति खुसि तबाला, लः यच्चुसे च्वं । ख्वाः सिलाः लः नं च्वनेगु । अबलय् खुसि छिनाः वनेत यान्तांयान्तां ताँ मदुनि । चिजाःगु सिँयागु छबालाचा ताँ जक दु ।
व तां छिनाः पारी लखुतीर्थय् वनेगु । खुसिबाः वल कि व ताँ चुइका यंकी, अले हाकनं मेगु ताँ दयेकी । ताँ मदयेकूतले न्यतपाःच्वं डल्लुइ वनेगु अप्पाया ताँ छिनाः हाकनं खुसि सिथं सिथं लखुतीर्थय् वयाः लः काः वयेगु । लिपा दैसाः त्वाःया नायः देवबहादुर मानन्धरं कंगं लखुतीर्थय् वनेगु यान्तांयान्तां ताँ दयेकाबिल । गुलि सालय् खः, मसिल ।
गुंला लछियंकं स्वयम्भूइ वनेगु, सुथय् ४ बजे हे त्वाःया पासा पूर्ण मानन्धरनापं छेँय् नं पिहां वनेगु । लँ शुन्य जूसां ग्यानापु धाःसा मजू । जिपिं स्वयम्भू च्वय् थ्यनीबलय् मूलम्ह भगवान द्यःयात ख्वाः सिकाच्वनी । द्यःया जल कायेगु । जिपिं स्वयम्भू चाःहिलाः लिहां वयेबलय् थीथी त्वाःया गुलां बाजं खलःत नापलाइ ।
छेँय् लिहां वयाः च्याः त्वनेगु चलन मदु । छखोला अय्लाः व बजि छभ्वाः बी, बजि भ्वाः तितिउँ अय्लाः त्वनेगु । जि न्यासि वने फुम्ह जुयाः बज्ये नं जितः जक द्यःयाथाय् ब्वनायंकी । केहेँ छम्ह दु, जानकी, व न्यासि वनेमफु ।न्हापा मोटर मदु, न्ह्याथाय् वंसां न्यासि हे वनेगु । मोहनिबलय् फुलपातिकुन्हु सुथ न्हापां दनाः बज्येनाप सिकाली व दक्षिणकाली द्यइके वनेगु ।
न्यखुइ थ्यनीबलय् द्यः तुयुतुयु धाइ । न्हापां सिकालीइ हँय् स्यानाः पुज्यायेगु, अले हानं दक्षिणकालीइ वनाः खाः स्यानाः पुज्यायेगु । सिकाली द्यः तलय् हे तयातइ, ततःग्वःगु त्यप पुज्यानाः पिने फल्चाय् नं तयातइ, आतापुतिइ लः थनाः त्यपय् क्वखायेकातइ । मूलम्ह पुरोहितं गुजि लं फिनातइ, सपः प्यानातइ । पुरोहित नं फल्चाय् च्वंच्वनी ।
गोदावरीइ झिंनिदँया मेला जुइबलय् नं अन थ्यंक न्यासि वनाः न्यासि हे लिहां वयेगु । गोदावरी मेलाय् दुनेच्वंगु पुखुलिइ म्वःल्हुइगु, पिने हिति दुथाय् मखु । अन निद्वाः लुखा दु, निखेरं ह्वाल्ल लः पिहां वयाच्वनी । न्ह्याथाय् द्यइके वंसां अन समय् जक नयाः लिहां वयाः छेँय् वयाः जा नः वयेगु ।
चाकु धार्नीया छतका, कालिमातिइ झिगः ध्यबा पाः जूगुलिं अन वनाः न्याः वनेगु । पाछै, चसूपलः छम्हूया धिब्छगः, ध्यागः (धिम्न्यः) बिलकि स्वम्हू बी, दथुइ ह्वः दुगु प्यंगः ध्यबाया न्याम्हू । जाकि फछि व घ्यः धार्नीया न्हय्तका जक । खसिया ला १ पाउया छसुका, अथे खःसां अबलय् उलि नःपिं मदु । ला न्यायेबलय् ‘न्ह्यपु ना ना धाइ, मयः मयः’ धायेगु ।
२०१५ सालय् जिगु ब्याहा चाबहिलिइ च्वंम्ह भाइराम मानन्धरनाप जुल । अबलय् चाबहिलिइ यक्व छेँ मदु, चोकं चन्द्रविनायक गणेद्यःयाथाय् वनेगु लँय् चिचिजाःगु सुपौ व टीनया पौ दुगु निझ्वः जक छेँ दु । गौशाला झिझां दं, अन जंगल जक छेँ मदु । बाङकोट ल्वहंहितिइ (गोपीकृष्ण हल वनेथाय्) लः काः वनेमाः ।
अनतक वनेत बुँया फाँटफाँटं वनेमाः । द्यामं वनेबलय् सर्प नं न्हुइयः । द्वं वःसा लिचिलेत थाय् मदु, कं झाः नं यक्वं दु । चाबही चुकय् लँ छबालाचा जक दु, मेगु फुक्क चौर, बुँ व क्यब जक । चौरय् झिपाः सुकू लानाः वा पायेगु, पिहां च्वनेम्वाः । सुन्दरीजलय् ध्यबा छापे याइथाय् यंकीगु मोटर छगः जिमिथासं यंकी ।
सक्वमितय्सं जाकि, बजि, छुचुं, घ्यः, सिँ क्वबिया हइ, अले जिमिगु छेँ क्वय् च्वनाः मी । इपिं सुथय् वइ अले निभाः दनीबलय् हे लिहां वनी, गोकर्णय् ध्यबा लुटे याइपिं खुँत च्वनाच्वनी हँ धकाः । व्यापार यानागु ध्यबा म्हिचाय् तयायंकल कि खुँतय्सं लुटे याना काइगुलिं इमिसं कय्ता दुने ध्यबा सुचुकाः यंकी ।
LEAVE YOUR COMMENTS